Nonstop Nonsense

ആ വിശ്യത്തോ യൂണിവേഴ്സിറ്റിയുടെ വരാന്തയിലെത്തിയപ്പോൾ പകച്ചുപോയെങ്കിലും ധൈര്യം പകരാൻ മോളിയാന്റി സാം പറഞ്ഞു. ചത്ത പച്ച അഥവാ Do or Die

- 

എല്ലാവർക്കും ഡോക്ടറേറ്റ് കിട്ടുന്ന വിശ്വോത്തര യൂണിവേഴ്സിറ്റിടെ സ്വന്തം വാട്സാപ്. പുവൻകോഴിയെക്കാൾ മുൻപ് ഓൺലൈനിലാകുന്നവരും പാതിരാകൊക്കിനെ പോലെ നൈറ്റ് ഡ്യൂട്ടി ചെയ്യുന്നവരുമായ പ്രഫസർമാർ ധാരാളം. ജെൻ സീക്കൊപ്പം പിടിച്ചു നിൽക്കാനും അവരുടെ ചിന്തകൾ അറിയാനുമാണു മോളിയാന്റി സോഷ്യൽമീഡിയയിൽ അടുത്തിടെ ലൈവ് ആയത്. ടെക്നോളജിയുടെ പകപ്പിനെ നേരിടാൻ ഡു ഓർ ഡൈ പറഞ്ഞ് തുടങ്ങിയ ആന്റി ജെൻ സീക്കൊ പ്പം കട്ടക്കു പിടിച്ചു നിന്നു.

പിളേളരൊക്കെ ബിടിഎസ് പാട്ട് മൂളി നടക്കുമ്പോൾ കഷ്ടപ്പെട്ട് ലിറിക്സ് നോക്കി പാട്ട് കേൾക്കുന്നതൊക്കെ അതിന്റെ ഭാഗം തന്നെ. “ആന്റി, ഈസ് നോട് ഔട്ഡേറ്റഡ്, വെരി അപ് ടു ഡേറ്റ്' എന്ന് റോസാ കൊച്ച് പറഞ്ഞത് ഇപ്പോളും കാതില് കുളിര് കോരി നിൽക്കുന്നു. പ്രേമത്തിനു മാത്രമല്ല, അഭിനനന്ദനം കേൾക്കാനുള്ള പൂതിക്കുമില്ല പ്രായമെന്ന് തോന്നും ആന്റിയുടെ ഉൾപ്പുളകം കണ്ടാൽ.

വാട് സാപ്പിലെ സുപ്രഭാതം

അതിപുലർകാലേ സോഫയിൽ ചാരിയിരിക്കുകയാണ് ആന്റി. എന്നിട്ടു വാട്സാപ്പിലെന്താണു തളിർത്തതെന്നു നോക്കാനുള്ള ഒരുക്കത്തിലാണ്. കപ്പിലെ ചായയിൽ നിന്നു മന്ദഗതിയിൽ ഉയരുന്നുണ്ട് ആവിയുടെ പതാകകൾ.