கேட்பதை கொடுக்கும் இளங்காடு வைகுண்டவாசப் பெருமாள்!

ஸ்ரீமன் நாராயணனே பரம்பொருள் என்று வேதங்கள் கூறுகின்றன. அவரின் பெருமையை வேதங்களாலும் விவரிக்க இயலாது என்கிறது பிரபந்தம்.

- ஜி.ஏ. பிரபா

ஆதி ஆன வானவர்க்கும் அண்டம் ஆய அப்புறத்து ஆதி ஆன வானவர்க்கும் ஆதியான ஆதி நீ. ஆதி ஆன வாணவர் அந்த காலம் நீ உரைத்தி ஆதி ஆன காலம் நின்னை யாவர் காண வல்லரே?

என்கிறார் திருமழிசை ஆழ்வார். பிரளய காலத்திற்குத் தலைவனான அவனை யாரால் அறிய முடியும்.

ஆனால் அறியாதவர்களுக்கும் அறியும்படியாகக் காட்சி தருகிறான் எம்பெருமான். காணும் இடமெல்லாம் நீக்கமற நிறைந்திருக்கும் அவனே பக்தர்களின் இன்னல் தீர்க்க உருவமாகக் காட்சி அளிக்கிறான்.

அவ்விதத்தில் நின்ற திருக்கோலத்தில் வைகுண்ட வாசனாகக் காட்சி அளிக்கும் அவன் பக்தர்கள் வேண்டுவதை வேண்டும் விதத்தில் அளிக்கிறான். அதில் இளங்காடு, மையனூர் ஆகிய இடங்கள் சிறப்பாகக் கருதப் படுகின்றன.

இளங்காடுவைகுண்டவாசப்பெருமாள்:

திருவண்ணாமலை மாவட்டத்தில் உள்ளது இளங்காடு என்ற சிற்றூர். இங்கு ஸ்ரீபூமி நீளா சமேத ஸ்ரீவைகுண்டவாசப் பெருமாள் என்ற பெயரில் ஒரு பழமையான ஆலயத்தில் எழுந்தருளி இருக்கிறார் பெருமாள். முன் ஒரு காலத்தில் க்ஷேத்திர விசேஷமாக இருந்த தலம். மூவாயிரம் வருடங்களாக திருவாராதனம் நடைபெற்று வருகிறது.

பெருமாள் நின்ற நிலையில் ஏழரை அடி உயரத்தில் அழகான திருமுக மண்டலத்துடன் காட்சி தருகிறார். சமணம், சாக்கியம், சைவம் முதலிய மதங்களைப் பின் பற்றிப் பின் விஷ்ணுவே பரமபுருஷன், மோட்சத்தைத் தருபவன் என்று உணர்ந்து திருமழிசை ஆழ்வார் இங்கு மங்களாசாசனம் செய்துள்ளார்.

அகோபில மடம் ஏழாவது பட்டம் ஜீயரான ஸ்ரீவண் சடகோப யதீந்த்ர மகா தேசிகன் இந்த ஊரில் பிறந்து, பெருமாளை மங்கள சாசனம் செய்துள்ளார்.

மகான்கள் வாசம் செய்த பூமி:

செஞ்சி ராஜகுருவான திருமலை நல்லான் சக்ரவர்த்தி சேஷாத்ரி ஆச்சார்யா என்னும் சுவாமிகள் இங்கு வந்து குடியேறி, அப்போது இருந்த சமணர்களை ஒழுங்கு படுத்தி அக்ரஹாரம் அமைத்துத் தன் வாரிசுகளைக் குடியமர்த்தினார்.

1315-ல் பிறந்த இவர் செஞ்சி அரச னால் இக்கோவிலுக்கு தர்மகர்த்தாவாக நியமிக்கப்பட்டு, இன்றுவரை அவரின் பரம்பரையினர் நிர்வாகம் செய்து வருகிறார்கள். ஒரு முறை ஆச்சார்யர் செஞ்சி, காஞ்சி இடங்களுக்குச் சென்று பெருமாளை சேவித்துவிட்டு வரும்போது ஒரு பூதம் அவரை மிரட்டியது என்றும், அதைத் தன் மந்திர சக்தியால் அடக்கித் தன் வீட்டுவேலை செய்ய வைத்துக் கொண்டதாகவும் கூறுகின்றனர்.