എനിക്ക് വ്യക്തമായ നിലപാടുകളുണ്ട് ഡോ. രജിത്കുമാർ

 ഡോക്ടർ രജിത് കുമാറിന്റെ വിശേഷങ്ങളിലൂടെ...

- അപ്പുസ്‌. കെ.എസ്‌

റയാൻ ഒരുപാടുണ്ട് കാതലായ തിരുത്തലുകൾ സംഭവിക്കണമെങ്കിൽ മാറ്റത്തിന് തയ്യാറായ ഒരു മനസ്സ് വേണം... നമ്മെ ചിന്തിപ്പിക്കുന്ന നമുക്കുള്ളിൽ മാറ്റത്തിന്റെ വിത്ത് പാകുന്ന ആശയങ്ങൾ പലയിടങ്ങളിലും പറഞ്ഞു വെച്ചിട്ടുള്ളയാളാണ് ഡോക്ടർ രജിത്കുമാർ. ബിഗ്ഗ് ബോസ് പോലൊരു വിനോദപരിപാടിയിൽ വന്നപ്പോൾ ഡോക്ടറുടെ ആശയങ്ങൾക്ക് കൂടുതൽ സ്വീകാര്യത ലഭിച്ചു എന്നത് ഒരു സത്യം മാത്രം. എന്നാൽ അവിടെയും കുറെ വെല്ലുവിളികൾ അദ്ദേഹത്തിന് നേരിടേണ്ടി വന്നു.

പുറത്ത് എണ്ണമറ്റ ആരാധകരെ നേടിയെടുത്തപ്പോഴും തൊട്ടടുത്ത് കീറിമുറിക്കാൻ കാത്തുനിൽക്കുന്ന ശത്രുക്കളെയാണ് ഡോക്ടർക്ക് ലഭിച്ചു കൊണ്ടിരുന്നത്. രണ്ട് വർഷങ്ങൾക്കിപ്പുറം രജിത് സാറിന്റെ ജീവിതത്തിൽ എന്ത് മാറ്റമാണ് സംഭവിച്ചിട്ടുള്ളത്? ഇപ്പോഴിതാ സിനിമയിലും സജീവമാകുകയാണ് പ്രേക്ഷകരുടെ പ്രിയപ്പെട്ട രജിത് സാർ. ഡോക്ടർ രജിത് കുമാറിന്റെ വിശേഷങ്ങളിലൂടെ...

രജിത് സാർ അന്നും ഇന്നും ആരാധകർക്ക് ഒരു വികാരമാണല്ലോ.

അങ്ങനെ കേൾക്കുന്നതിൽ സന്തോഷമുണ്ട്. ഒരു വ്യക്തി ഒരു വികാരമാണ് എന്ന് പറയുന്നത് അയാൾ സത്യമാണ്. അല്ലെങ്കിൽ അയാൾ സഞ്ചരിക്കുന്നത് സത്യത്തിന്റെ വഴിയിലൂടെയാണ് എന്ന് തിരിച്ചറിയുമ്പോഴും അംഗീകരിക്കപ്പെടുമ്പോഴുമാണ്.  അങ്ങനെ നോക്കുമ്പോൾ ഈ വിശേഷണം ഏറെ സന്തോഷം തരുന്നുണ്ട്. കാരണമെന്തെന്നാൽ പല ഘട്ടങ്ങളിലും തെറ്റിദ്ധാരണകളിലൂടെ കടന്നുപോയിട്ടുള്ളതാണ് ഞാനും എന്റെ ആശയങ്ങളും. ചിലതെല്ലാം ഏറെ വൈകി മാത്രമാണ് സത്യമെന്ന് തിരിച്ചറിയപ്പെടുക. നമ്മുടെ ആശയങ്ങൾ ഒറ്റപ്പെടുമ്പോൾ സ്വാഭാവികമായും നമ്മളും ഒറ്റപ്പെടും. എനിക്കുണ്ടായിട്ടുള്ള അനുഭവങ്ങൾ അതുതന്നെയാണ്. ഞാൻ പറയുന്ന കാര്യങ്ങൾ ആൾക്കാർ അംഗീകരിക്കാതെ വരുമ്പോൾ, അവയോടൊപ്പം എന്നെയും കൂടി ഒറ്റപ്പെടുത്തുന്ന ഒരു പ്രവണത ഞാൻ കണ്ടി ട്ടുണ്ട്. നമ്മൾ പറയുന്നത് സത്യമാണെങ്കിൽ കാലം കുറച്ച് കഴിഞ്ഞാലും അത് അംഗീകരിക്കാതിരിക്കാൻ സമൂഹത്തിന് കഴിയില്ല എന്നാണ് ഞാൻ കരുതുന്നത്. അത് അനുഭവത്തിൽ പലതവണ വന്നിട്ടുമുണ്ട്.

ഒറ്റപ്പെടൽ ആസ്വദിക്കുന്ന ആളാണെന്ന് തോന്നുന്നു.