பாடகி "பெயரில் மோசடி....

தொழில்நுட்ப வளர்ச்சிகள் பெருகிவிட்ட இந்த நவீன காலகட்டத்தில் டிஜிட்டல் அரெஸ்ட் போன்ற நூதனமான மோசடிகள் நாளுக்கு நாள் அரங்கேறி வருகின்றன. இப்போது ஒருபடி மேலே போய் ஏ.ஐ. டெக்னாலஜியை பயன்படுத்தி பிரபலங்களின் உருவங்களில் விளம்பரம் செய்து மோசடி செய்யத் தொடங்கி விட்டனர். அந்த வகையில் ஏ.ஐ. மோசடி சர்ச்சையில் சிக்கியுள்ளார் பிரபல பின்னணி பாடகி ஸ்ரேயா கோஷல்.

- தவா

நிறைய இசைக் கச்சேரிகளை நடத்தி வரும் ஸ்ரேயா கோஷல், சமீபத்தில் அளித்த பேட்டி ஒன்றில், “அக்னி பாத் படத்தில் இடம்பெற்ற சிக்னி சமேலி என்ற ஐட்டம் பாடலை சிறு குழந்தைகள் கூட பாடலின் அர்த்தம் என்ன எனத் தெரியாமல் பாடுகிறார்கள். நடனமும் ஆடுகிறார்கள்.

பாடல் நன்றாக இருப்பதாக என்னிடமே தெரிவிப்பது எனக்கு சங்கடமாக உள்ளது. இப்படிப்பட்ட பாடலை பாடியதற்கு வெட்கப்படுகிறேன்” என்று கூறியிருந்தார்.

இப்போது ஏ.ஐ. மோசடி சர்ச்சை வேறு அவருக்கு மன உளைச்சலை ஏற்படுத்தி இருக்கிறது.

ஹிந்தி நடிகை கரீனா கபூர், ஸ்ரேயா கோஷலை மிர்ச்சி பிளஸ் என்ற நிகழ்ச்சிக்காக செய்யும் நேர்காணலில்... 'இந்த அளவுக்கு ஆடம்பர வாழ்க்கை நடத்த உங்கள் வருமானத்தை எப்படி எல்லாம் பெருக்குகிறீர்கள்' என கேட்கிறார்.

அதற்கு ஸ்ரேயா கோஷல், “பாடல் வருமானத்தின் மூலம் மட்டும் எனக்கு பணம் கிடைக்கவில்லை. "லோவரியோனிக்ஸ் லிக்விடிட்டி என்ற ஏ.ஐ. தொழில்நுட்பம் அடிப்படையிலான வர்த்தக தளத்தில் முதலீடு செய்து நிறைய பணம் சம்பாதிக்கிறேன். ஒரு நாளைக்கு எனக்கு ரூ.1.8 லட்சம் முதல் ரூ.2.5 லட்சம் வரை வருமானம் கிடைக்கிறது. இதற்கு நான் பெரிதாக மெனக்கெடவும் தேவையில்லை” என்று கூறுகிறார்.

அது எப்படி சாத்தியமாகும்... என கரீனா கபூர் கேட்க, ஸ்ரேயா கோஷல் லைவ் டெமோ செய்து காட்டுகிறார்.

அதன்படி ஏ.ஐ. டிரேடிங் பிளாட்பார்மில் குறைந்தபட்சம் ரூ.21 ஆயிரம் முதலீடு செய்து காண்பித்து அடுத்த 30 நிமிடங்களில் ரூ.6,715 கூடுதல் வருமானம் பெறுகிறார்.

இந்த நேர்காணல் நிகழ்ச்சி வெளியான உடனே, எங்கே இருக்கும் வேலையை விட்டு விட்டு எல்லா அரசு மற்றும் தனியார் ஊழியர்களும் ஏ.ஐ. டிரேடிங் செய்வதற்காக கிளம்பி விடுவார்களோ... என அரசாங்கமே பயப்படுகிறது என்பது போல செய்திகள் பரவத் தொடங்குகிறது. நாட்டின் பொருளாதாரத்திற்கு தீங்கு விளைவிக்கும் ரகசிய தகவல்களை கசியவிட்டதாக ஸ்ரேயா கோஷல் மீது குற்றச்சாட்டுகள் சுமத்தப்பட்டு உள்ளதால், அவரை கைது செய்ய அரசு உத்தரவிட்டது. இதனால் அதிர்ச்சியடைந்த ரசிகர்கள் தங்கள் கோபத்தை வெளிப்படுத்தி வருகின்றனர்.

இதன் விளைவாக, அவர் வீட்டுக் காவலில் வைக்கப்பட்டுள்ளார். மேலும் அவர் ஊடகங்களை அணுகுவதற்கு தடை விதிக்கப்பட்டுள்ளது... என்ற செய்தி தீயாக பரவத் தொடங்கியது.