ഗ്രീൻവാഷിംഗ്

വാക്കിന്റെ വർത്തമാനം

- ഡോ. പ്രസീത പി. ഫോൺ: 8714761861

പരിസ്ഥിതി സൗഹൃദപരമായി ജീവിക്കേണ്ടതിന്റെ ആവശ്യകതയെക്കുറിച്ച് ലോകജനതയ്ക്കിടയിൽ ഗൗരവത്തിലുള്ള ആലോചനകളുണ്ടാകുന്നത് 1970-കളോടെയാണ്. പരിസ്ഥിതി സംരക്ഷണത്തിലൂന്നിയ പെരുമാറ്റച്ചട്ടങ്ങളിലൂടെ രാഷ്ട്രീയ പാർട്ടികളും സാംസ്കാരിക കൂട്ടായ്മകളും വിവിധ രാജ്യങ്ങളിൽ ഇതോടുകൂടി പ്രബലമാകുന്നു. 1980-കളോടെ വ്യാവസായിക - വാണിജ്യ മേഖലകളും സുസ്ഥിര വികസനമെന്ന ആശയം സ്വീകരിച്ചുകൊണ്ട് പ്രവർത്തിക്കാൻ നിർബന്ധിതരാകുന്നുണ്ട്. ഇതിനോട് ചേർത്ത് മനസ്സിലാക്കേണ്ട ഒരു സംയുക്തപദമാണ് ഗ്രീൻവാ (Greenwashing). 1986ൽ അമേരിക്കൻ പരിസ്ഥിതി പ്രവർത്തകനും ഗവേഷകനു മായ ജെയ്സ്റ്റർവെൽഡ് ഹോട്ടൽ നടത്തിപ്പിനെക്കുറിച്ച് നടത്തിയ പഠനത്തിലാണ് ഗ്രീൻവാഷിംഗ് എന്ന് ആദ്യമായി രേഖപ്പെടുത്തിയത്. ഉപഭോക്താക്കളുടെ താല്പര്യങ്ങൾക്ക് നിരക്കാത്ത, പരിസ്ഥിതി സൗഹൃദപരമല്ലാത്ത പ്രവർത്തനങ്ങളിൽ നിന്ന് ശ്രദ്ധതിരിക്കുന്നതിനായി വ്യാജമായ പരിസ്ഥിതിസൗഹൃദ പരിപാടികൾ പ്രോത്സാഹിപ്പിക്കുന്ന സമ്പ്രദായം എന്നാണ് വെബ്സ്റ്ററിന്റെ ന്യൂ മില്ലേനിയം ഡിക്ഷണറി ഓഫ് ഇംഗ്ലീഷ് ഗ്രീൻവാഷിംഗിനെ നിർവചിക്കുന്നത്. ഗ്രീൻ ബാങ്കിംഗ്, ഗ്രീൻ മാർക്കറ്റിംഗ്, എന്നുതുടങ്ങി സിനിമാ പ്രദർശനത്തിനു വരെ ഹരിത പെരുമാറ്റച്ചട്ടം പാലിച്ചിട്ടുണ്ട് എന്ന പരസ്യ പ്രഖ്യാപനങ്ങൾ കാണാറില്ലേ? അതുമല്ലെങ്കിൽ നമ്മുടെ നാട്ടിൽ ഭക്ഷ്യസുരക്ഷയുമായി ബന്ധപ്പെട്ട് സാധനങ്ങ ളുടെ വില്പനയിൽ പലരും ഓർഗാനിക്ക്, പ്രകൃതിദത്തം, ജൈവം എന്നെല്ലാമുള്ള പ്രയോഗങ്ങൾ പരസ്യങ്ങൾക്കായി ഉപയോഗിക്കുന്നത് കണ്ടിട്ടില്ലേ? ശാസ്ത്രീയമായി പരിശോധിച്ചാൽ അവയിൽ പലതും അടിസ്ഥാനരഹിതവും മനഃപൂർവം തെറ്റിദ്ധരിപ്പിക്കുന്നതുമായ വിവരങ്ങൾ പ്രചരിപ്പിച്ച് ലാഭമുണ്ടാക്കാൻ നടത്തുന്ന ശ്രമങ്ങൾ മാത്രമാണ്. തങ്ങളുടെ ഉല്പന്നത്തിന് അല്ലെങ്കിൽ സംരംഭത്തിന് പാരിസ്ഥിതിക സുരക്ഷാ മുൻ കരുതലുകളുണ്ടെന്ന പ്രതിച്ഛായ ലഭിക്കുന്നതിനായി ബിസിനസ്സുകാർ, സംഘടനകൾ അല്ലെങ്കിൽ ഗ്രൂപ്പുകൾ ഇങ്ങനെയുള്ള വ്യാജപ്രചാരണം നടത്തുന്നതിനെ ഈ രീതിയിൽ മനസ്സിലാക്കാവുന്നതാണ്.