പോസ്റ്റ്മോർട്ടം പരിശോധന

പോസ്റ്റ് മോർട്ടം പരിശോധന എന്താണെന്നും അവയുടെ പ്രാധാന്യമെന്താണെന്നും വിശദമാക്കുന്നു. പോസ്റ്റ്മോർട്ടം എന്തിനാണെന്നും അതിന്റെ നിയമവശങ്ങളെന്താണെന്നും വ്യക്തമാക്കുന്നു. പോസ്റ്റ്മോർട്ടം റിപ്പോർട്ട് ലഭ്യമാകുന്നതിന്റെ നടപടികളെന്തെല്ലാമെന്ന് വിശദീകരിക്കുന്നു.

- ഡോ. ഉന്മേഷ് എ കെ Police Surgeon Government Medical College Thrissur

ജൂലിയസ് സീസർ എന്ന വിശ്വപ്രസിദ്ധനായ റോമൻ ചക്രവർത്തിയെ അറിയാത്തവരായി ആരും തന്നെയുണ്ടാകാൻ സാധ്യതയില്ല. സ്കൂളുകളിലെ ചരിത്രപാഠപുസ്തകങ്ങൾ പഠിച്ചവർ ആ പേര് ഒരിക്കലെങ്കിലും കേട്ടിട്ടുണ്ടാവും. എന്താണ് ജൂലിയസ് സീസറും വൈദ്യശാസ്ത്രവും തമ്മിലുള്ള ബന്ധം? ഒരുപക്ഷേ, മറ്റാർക്കും അവകാശപ്പെടാനില്ലാത്ത ഒരാത്മബന്ധമാണ് സീസറിന് ഇക്കാര്യത്തിലുള്ളത് എന്നു പറയേണ്ടി വന്നേക്കും. ജനനം കൊണ്ടും മരണം കൊണ്ടും ഒരാൾ ചരിത്രരേഖകളിൽ ഇടംപിടിക്കുക എന്നുവെച്ചാൽ ഒരുപക്ഷേ, അത് സീസറിനുമാത്രം സാധിച്ചിട്ടുള്ള ഒരപൂർവ സൗഭാഗ്യം ആയിരുന്നിരിക്കണം. അമ്മയുടെ ഗർഭപാത്രം കീറി കുഞ്ഞിനെ പുറത്തെടുക്കുന്ന പ്രക്രിയയായ സിസേറിയൻ സെക്ഷൻ' എന്ന ഓപ്പറേഷന് ആ പേരുവരാനുള്ള കാരണം, ആദ്യമായി ജൂലിയസ് സീസറിനെ അത്തരത്തിൽ ജനിപ്പിച്ചതിനാലാണെന്ന് ഒരു പൊതുധാരണയുണ്ട്. ജനനത്തിന്റെ കാര്യത്തിൽ അതൊരു ധാരണ മാത്രമാണെങ്കിലും, ലോകത്താദ്യമായി നടത്തിയ പോസ്റ്റ്മോർട്ടം പരിശോധന മഹാനായ ജൂലിയസ് സീസറിന്റെ മൃതശരീരത്തിൽ ആയിരുന്നുവെന്നുള്ളത് ഒരു ചരിത്രസത്യമാണ്. സ്വന്തം അനുയായികളുടെ കുത്തേറ്റു മരിച്ച സീസറിന്റെ മൃതശരീരം പോസ്റ്റ്മോർട്ടം പരിശോധന നടത്തിയത് അദ്ദേഹത്തിന്റെ ഭിഷ്വഗ്വരനായ ആന്റിസ്റ്റിയസ് ആയിരുന്നത്രേ! സീസറിനേറ്റ ഇരുപത്തിമൂന്ന് കുത്തുകളിൽ നെഞ്ചിനേറ്റ, മരണകാരണമായ മുറിവേൽപ്പിച്ചത് ഏറ്റവും അടുത്ത അനുയായിയായിരുന്ന ബ്രൂട്ടസ് ആയിരുന്നുവെന്നുള്ളതും മറ്റൊരു സത്യം. ഇത് ലോകചരിത്രം.