“അംബാജി ശക്തിപീഠങ്ങളിലെ ശക്തിദുർഗ്ഗ

അറിയപ്പെടുന്ന അൻപത്തൊന്ന് ശക്തിപീഠങ്ങളിലൊന്നാണ് ഗുജറാത്തിന്റെയും രാജസ്ഥാന്റെയും അതിർത്തി പങ്കിടുന്ന 'ബനാസ്കാന്ത' ജില്ലയിലെ അരാസുർ' എന്നറിയപ്പെടുന്ന പർവ്വതനിരകളോടു ചേർന്നു കിടക്കുന്ന ‘അംബാജി’ എന്ന ചെറുപട്ടണം

- കണ്ണാനി കാനം

ഇവിടെയാണ് പ്രസി ദ്ധവും എന്നും ദേവീചൈതന്യം നിറഞ്ഞുനിൽക്കുന്നതും ഭഗവത് സാമീപ്യം വിളിച്ചോതുന്നതുമായ പുണ്യ ആരാധനകേന്ദ്രവും ശക്തിസ്വരൂപിണിയായ അംബാജി മാതാക്ഷേത്രം സ്ഥിതി ചെയ്യുന്നത്. ഇപ്പോൾ അംബാജിയെന്ന് നാമകരണം ചെയ്യപ്പെട്ടിരിക്കുന്ന ഈ സ്ഥലം "ആരവല്ലി മലനിരകളിലെ 'ഗബ്ബർ' കുന്നുകളോട് ചേർന്നുകിടക്കുന്നതും സരസ്വതി നദിയുടെ ഉത്ഭവസ്ഥാനത്തോടും ചേർന്ന് സ്ഥിതി ചെയ്യുന്നു. ഗുജറാത്തിലെ ഏറ്റവും വലിയ പ്രത്യേകതകൾ നിറഞ്ഞ ഈ ക്ഷേത്രം ശക്തീ ദേവിയായ സതീദേവിയുടെ ഹൃദയം പതിച്ച സ്ഥലമാണന്നാണ് വിശ്വസിച്ചു പോരുന്നത്.

ഏത് ക്ഷേത്രത്തിനും അതിന്റേതായ പ്രത്യേകതകളും ഐതിഹ്യങ്ങളും നിലനിന്നു പോരുന്നു. അത്തരം ഐതിഹ്യങ്ങൾ അംബാജി ക്ഷേത്രത്തിനു പിന്നിലും കണ്ടുവരുന്നു.

ദക്ഷപ്രജാപതിയുടെ പുത്രിയായി ആദിശക്തി സതീരൂപത്തിൽ ജന്മമെടുത്തു. പരമശിവനുമായി സംഗമിക്കുകയായിരുന്നു സതീദേവിയുടെ ഇതിലൂടെയുള്ള ഗൂഢലക്ഷ്യം. ശിവവിരോധിയായ ദക്ഷന്, സതിയുടെ ശിവനുമായുള്ള ഈ ബന്ധം ഒന്നുകൊണ്ടും സ്വീകാര്യമായിരുന്നില്ല. എന്നാൽ ശിവനും സതിയുമായുള്ള വിവാഹം നടക്കുകയുണ്ടായി. ഇതിലൂടെ ദക്ഷന് ശിവനോടുള്ള പകയും വിരോധവും വർദ്ധിക്കുവാൻ ഇടയായി.

പ്രിയപുത്രിയായ സതീദേവി തന്റെ ഇച്ഛയ്ക്ക് വിരുദ്ധമായി ഒരു യോഗിയായ ശിവനെ വിവാഹം ചെയ്തതിലൂടെ കടുത്ത നീരസത്തിലായി.

സതീദേവിയുടെ പിതാവായ ദക്ഷാപ്രജാപതി ഒരിക്കൽ വിപുലമായ ഒരു യജ്ഞം ഒരുക്കുവാൻ തീരുമാനം കൈക്കൊള്ളുന്നു. ഈ യജ്ഞത്തിലേക്ക് എല്ലാ ദേവീദേവന്മാരേയും ക്ഷണിക്കുകയുണ്ടായി. എന്നാൽ ഈ യജ്ഞത്തിൽ നിന്നും മനപ്പൂർവ്വം തന്റെ മകളുടെ പതിയായ ശിവനേയും മകളായ സതിയേയും വിളിക്കാതെ അകറ്റി നിറുത്താനും തീരുമാനിക്കുന്നു.