അയ്യപ്പ തിന്തകത്തോം, സ്വാമി തിന്തകത്തോം, മതമൈത്രിയുടെ മഹനീയ സന്ദേശം - പുതുമന മധു നമ്പൂതിരി

പേട്ടതുള്ളൽ ജനുവരി 12 ന്

-  പി. ജയചന്ദ്രൻ

മതമൈത്രിയുടെ മഹനീയ സന്ദേശം ഉദ്ഘോഷിക്കുന്ന കലിയുഗവരദനായ അയ്യപ്പൻ അവതാ രലക്ഷ്യം കൈവരിച്ച മണ്ണ് എന്ന നിലയിൽ, അയ്യപ്പചരിത്രത്തിൽ എരുമേലിക്കുള്ള സ്ഥാനം അദ്വിതീയമാണ്. പന്തള രാജകുമാരൻ അയ്യപ്പൻ രാജവൈദ്യന്റെ നിർദ്ദേശപ്രകാരം അമ്മയുടെ രോഗശമനത്തിനുവേണ്ട പുലിപ്പാലിനാ യുള്ള യാത്രയിൽ കാനനമദ്ധ്യ ത്തിൽ വച്ച് മഹിഷിയെ വധിച്ചു എന്നാണല്ലോ ഐതിഹ്യം പറയുന്നത്. അങ്ങനെ മഹിഷിയെ(മഹിഷി എന്നാൽ എരുമ എന്നാണർത്ഥം) നിഗ്രഹിച്ച സ്ഥലം എരുമകൊല്ലിയും(എരുമയെ കൊന്ന സ്ഥലം) കാലാന്തരത്തിൽ എരുമേലിയും ആയിത്തീർന്നു എന്ന് സ്ഥലനാമ പുരാണം പറയുന്നു. എന്നാൽ എരുമേലി അയ്യപ്പചരിതവുമായി കൂടുതൽ ബന്ധപ്പെട്ടുകിടക്കുന്നത് ഈ പുണ്യഭൂമിയിൽ സ്ഥിതിചെയ്യുന്ന ധർമ്മശാസ്താക്ഷേത്രത്തിന്റെ സാന്നിദ്ധ്യത്താലാണ്.

കേരളസൃഷ്ടാവായ പരശു രാമൻ കേരളഭൂമിയുടെ രക്ഷയ്ക്കായി കുളത്തൂപ്പുഴ, ആര്യങ്കാവ്, അച്ചൻകോവിൽ, കാന്തമല, ശബരിമല എന്നിങ്ങനെഅഞ്ച് ശാസ്താക്ഷേത്രങ്ങളാണ് പണികഴിപ്പിച്ചത്. എന്നാൽ അതിൽ പെടാത്തതും, അതേസമയം ശബരിമല ക്ഷേത്രത്തോളം തന്നെ പ്രാധാന്യവും പൗരാണികതയും അവകാശപ്പെടുന്നതുമായ ക്ഷേത്രമാണ് എരുമേലി ശ്രീധർമ്മശാസ്താക്ഷേത്രം. മധ്യകേരളത്തിലെ മറ്റ് ശാസ്താക്ഷേത്രങ്ങളിൽ നിന്ന് തികച്ചും വ്യത്യസ്തമാണ്, ശബരിമലയുടെ പ്രധാന ഇടത്താവളം കൂടിയായ ഈ ക്ഷേത്രം. തോടയാഭരണങ്ങൾ അണിഞ്ഞ്, തിങ്ങിനിറഞ്ഞ കേശഭാര മകുടത്തോടുകൂടിയുള്ള ഇവിടുത്തെ പ്രതിഷ്ഠാവിഗ്രഹം വലതുകയ്യിൽ വില്ലും അമ്പുമേന്തി കിഴക്കോട്ട് നോക്കി നിൽക്കുന്ന ഭാവത്തിലാണ്.

യോദ്ധാവിനെപ്പോലെ തുറിച്ച കണ്ണുകളും നീണ്ട മൂക്കും, ആരെയും ഭീതിപ്പെടുത്തുന്ന രൗദ്രഭാവത്തോടുംകൂടി, മഹിഷിവധം കഴിഞ്ഞുനിൽക്കുന്ന കിരാതമൂർത്തി ഭാവത്തിലാണ് എരുമേലി ധർമ്മശാസ്താവിന്റെ പ്രതിഷ്ഠാസങ്കൽപ്പം. അതേ ഭാവത്തിൽ തെല്ലിട പോലും മാറ്റം വരുത്താതെയുള്ള ശീവേലി വിഗ്രഹവുമുണ്ട്.

അനിർവചനീയമായ ശാസ്ത്രകലകളാൽ സമ്പന്നമായ ക്ഷേത്രത്തിന് ആയിരത്തി ഒരുനൂറിൽപ്പരം വർഷത്തെ പഴമയാണ് കണക്കാക്കപ്പെടുന്നത്. അബ്രാഹ്മ ണരായ നാടുവാഴികൾക്കായിരുന്നു ആദ്യകാലത്ത് ക്ഷേത്രഭരണച്ചുമതല. പിന്നീട് രാജഭരണത്തിൻ കീഴിലുമായി. ഇപ്പോൾ തിരുവിതാംകൂർ ദേവസ്വം ബോർഡിന് കീഴിലും.