പാഞ്ചാലിയുടെ അന്നദാനം വഴിപാടായ ക്ഷേത്രം

ചരിത്രപ്രസിദ്ധമായ ഇരിങ്ങാലക്കുട ക്ഷേത്രം. കൂടൽമാണിക്യം ക്ഷേത്രത്തിലെ ആറാട്ട് ഒന്നിടവിട്ട വർഷങ്ങളിൽ നടക്കുന്ന രാപ്പാൾ ആറാട്ടുകടവ്.

- ബാബുരാജ് പൊറത്തിശ്ശേരി 9846025010

ചരിത്രപ്രസിദ്ധമായ ഇരിങ്ങാലക്കുട ക്ഷേത്രം. കൂടൽമാണിക്യം ക്ഷേത്രത്തിലെ ആറാട്ട് ഒന്നിടവിട്ട വർഷങ്ങളിൽ നടക്കുന്ന രാപ്പാൾ ആറാട്ടുകടവ്.

പുണ്യനദിയായ നന്ദിനിപ്പുഴയെന്ന കുറുമാലിപ്പുഴയുടെ തീരത്ത് രാപ്പാൾ ആറാട്ടുകടവിന് സമീപത്തായി പുഴയോരത്ത് തന്നെ സ്ഥിതി ചെയ്യുന്ന, ഇരുകൈകളിലും നിറ വെണ്ണയുമായി പശ്ചിമദൃശ്യനായി ബാലഭാവത്തിൽ ചെറുപുഞ്ചിരിയോടെ അനുഗ്രഹം ചൊരിഞ്ഞ് വിരാജിക്കുന്നു രാപ്പാൾ ശ്രീകൃഷ്ണ സ്വാമി.

പട്ടുകോണമുടുത്ത് കിങ്ങിണിയും കിരീടവും ധരിച്ച് മാലയണിഞ്ഞ് രണ്ട് കയ്യിലും വെണ്ണയുമേന്തി ഓടാനായി കാൽ മടക്കിപ്പിടിച്ച വിധത്തിലുള്ള ഒരു ഉണ്ണിക്കണ്ണനാണ് ഇവിടെ പ്രതിഷ്ഠ.

കുട്ടികളെ ഏറെ ഇഷ്ടപ്പെടുന്ന മൂർത്തിയാണ് ഇവിടുത്തെ വെണ്ണക്കണ്ണൻ. താന്ത്രികവിധി പ്രകാരമുള്ള പൂജാവിധികളിൽ ഏറെ നിഷ്ക്കർഷത പുലർത്തിക്കൊണ്ട് പഴമയുടെ സാത്വികതയെ സമ്പൂർണ്ണമായി നിലനിർത്തിവരുന്ന അപൂർവ്വം ക്ഷേത്രങ്ങളിൽ ഒന്നാണ് രാപ്പാൾ ശ്രീകൃഷ്ണ പുരാക്ഷേത്രം.

ബാലസ്വരൂപനായ വെണ്ണക്കണ്ണനാണ് ഈ ക്ഷേത്രത്തിലെ പ്രതിഷ്ഠ. ശതാബ്ദങ്ങളോളം പഴക്കമുണ്ട് ഈ ക്ഷേത്രത്തിന്. മറ്റ് പല ക്ഷേത്രങ്ങളിലും ദർശിക്കുവാൻ സാധിക്കാത്ത നിരവധി വ്യത്യസ്തതകളും കാണാനാകും. രാപ്പാൾ ഉണ്ണിക്കണ്ണന്റെ നിത്യനിദാന പൂജകളിൽ നമുക്ക് ഇവയെല്ലാം ദർശിക്കാൻ സാധിക്കും. ക്ഷേത്രമതിൽക്കകത്ത് വെച്ച് കുട്ടികളെ ആരെങ്കിലും ശകാരിക്കുകയോ, ശാസിക്കുകയോ ചെയ്യുന്നത് ഇവിടെ ഭഗവാന്റെ അനിഷ്ടത്തിന് ഇടയാക്കും. ഏറെ ശ്രദ്ധയോടെയാണ് ഭക്തർ ദർശനം നടത്തി പ്രദക്ഷിണം നടത്തുക.

ധനുമാസം ഒന്ന് മുതൽ മുപ്പതു ദിവസവും ഭഗവാന് ദദ്ധ്യം (തൈര്) നിവേദിക്കുന്ന കേരളത്തിലെ അപൂർവ്വം ക്ഷേത്രങ്ങളിലൊന്നാണ് തൃശൂർ ജില്ലയിൽ പുതുക്കാടിനടുത്ത് (എൻ.എച്ച്. 47 ൽ നന്തിക്കരക്കടുത്ത് കൊടകരയ്ക്കും പുതുക്കാട്ടിനും മദ്ധ്യേ നന്ദിയാറിന്റെ തീരത്തുള്ള രാപ്പാൾ ശ്രീകൃഷ്ണ ക്ഷേത്രം. ദധിയും അന്നവും ചേർന്ന നിവേദ്യമാണ് ദദ്ധ്യന്നം. ഭഗവാൻ കൃഷ്ണന്റെ പ്രിയ നിവേദ്യം.

മഹാഭാരതയുദ്ധം നടന്നത് മലയാളത്തിലെ കാലഗണന അനുസരിച്ച് ധനു ഒന്നാം തീയതി മുതൽ പതിനെട്ട് ദിവസമായിരുന്നുവെന്നാണ് സങ്കൽപ്പം. മഹാഭാരതയുദ്ധത്തിന് പോകുന്ന കൃഷ്ണന് പാഞ്ചാലി പാചകം ചെയ്തു കൊടുത്ത ഭക്ഷണമായിരുന്നു ദദ്ധ്യന്നം. ദദ്ധ്യന്നം കഴിച്ചു സാരഥിയായി പോയ കൃഷ്ണന് പാണ്ഡവരുടെ വിജയം സുനിശ്ചിതമാക്കാൻ സാധിച്ചുവെന്നത് കഥകളുടെ അനുബന്ധം.