സ്ത്രീ ശാക്തീകരണത്തിന്റെ ദൈവിക ഭാവവുമായി ശ്രീ ആറ്റുകാൽ ഭഗവതി

ആറ്റുകാൽ പൊങ്കാല ഫെബ്രുവരി 25 ന്

- 

സ്ത്രീകളുടെ ശബരിമല എന്ന് ഖ്യാതി കേട്ട് ആറ്റുകാൽ ദേവീക്ഷേത്രത്തിൽ ഈ വർഷത്തെ പൊങ്കാല മഹോത്സവം 2024 ഫെബ്രുവരി 25 ഞായറാഴ്ചയാണ്. സ്ത്രീകളുടെ ആവേശവും ആനന്ദവുമായ സാക്ഷാൽ ആറ്റുകാലമ്മയുടെ ഉത്സവനാളുകളാണ് പൊങ്കാലയോട് അനുബന്ധിച്ചുള്ള 10 ദിവസങ്ങൾ... ഭൂമിയെ പ്രതിനിധീകരിക്കുന്ന മൺക ലവും അരിയും മറ്റുഭൂതങ്ങളായ വായു, ജലം, ആകാശം, അഗ്നി എന്നിവയോട് ചേരുമ്പോൾ ഉണ്ടാകുന്ന ആനന്ദമാണ് യഥാർത്ഥത്തിൽ പൊങ്കാല നിവേദ്യം.

പൊങ്കാലയ്ക്ക് പുതിയ മൺകലവും പച്ചരിയും ശർക്കരയും നെയ്യും നാളീകേരവും മറ്റുമാണ് ഉപയോഗിക്കുന്നത്. പഞ്ചഭൂതാത്മകമായ ശരീരത്തിൽ ഉൾക്കൊണ്ടിരിക്കുന്ന അംശങ്ങൾ ഒന്നിച്ചുചേരുമ്പോൾ അതിൽ നിന്നുണ്ടാകുന്ന ആനന്ദം പ്രതീകാത്മകമായ ഒന്നാണ്. പൊങ്കാല മഹോത്സവത്തിൽ ഭക്തരായ സ്ത്രീജനങ്ങൾ ജാതിമതഭേദമെന്യേ പൊങ്കാല നിവേദ്യം സ്വയം പാകം ചെയ്ത് ആറ്റുകാലമ്മയ്ക്ക് സമർപ്പിച്ച് സായൂജ്യമടയുന്നു.

ആശ്രയിക്കുന്നവരെ രക്ഷിക്കുന്ന ദേവി മഹാമായയാണ് ആറ്റുകാലമ്മ. ചിലപ്പതികാരത്തിലെ കണ്ണകിയുടെ സങ്കൽപ്പത്തിലും സ്ത്രീ ശാക്തീകരണത്തിന്റെ ദൈവിക ഭാവത്തിലും ദാരുകനിഗ്രഹശേഷം കോപം ശമിക്കുന്ന ഭാവത്തിലുമാണ് ആറ്റുകാലമ്മ. ആ അമ്മയുടെ ഏറ്റവും പ്രധാന ദിവസമാണ് കുംഭത്തിലെ പൂരം നക്ഷത്രം. ഈ ദിവസം ആണ് അമ്മയ്ക്ക് ഭക്തജനങ്ങൾ നേരിട്ട് നിവേദ്യം അർപ്പിക്കുന്നത്. ദേവിക്കുള്ള ആത്മസമർപ്പണമാണ് പൊങ്കാല. പൊങ്കാല അർപ്പിച്ച് ദേവി യോട് ഉള്ളുതുറന്ന് പ്രാർത്ഥിച്ചാൽ ഫലം ഉറപ്പാണ് എന്നാണ് വിശ്വാസം. ഭക്തൻ തന്റെ മനസ്സും ശരീരവും ധനവും അമ്മയ്ക്ക് സമർപ്പിക്കുന്നതിന് തുല്യമാണ് പൊങ്കാല സമർപ്പിക്കു ന്നത്. തനുമനധന സമർപ്പണം എന്നാണ് പൊങ്കാലയെ വിശേഷിപ്പിക്കുന്നത്. വ്രതമെടുത്ത് ദർശനം നടത്തുന്നത് തനു സമർപ്പണം. അമ്മയോടുള്ള പ്രാർത്ഥന മനസ്സമർപ്പണം നിവേദ്യവസ്തുക്കൾ കൊണ്ടുള്ളത് ധനസമർപ്പണം. ഇത് മൂന്നും ഒത്തുചേരുമ്പോൾ പൂർണ്ണമായ സമർപ്പണം തന്നെയാകും.

മംഗല്യഭാഗ്യത്തിനും സത്സന്താനത്തിനും അമ്മയ്ക്കരികിൽ അഭയം തേടുന്നവർക്ക് ഒരിക്കലും ദുഃഖിക്കേണ്ടി വരില്ലെന്നാണ് അനുഭവസാക്ഷ്യങ്ങൾ. പാർവ്വതിദേവിയുടെ അവതാരമായ കണ്ണകി സങ്കൽപ്പമാണ് ദേവിയുടേത്. വടക്ക് ദർശനമായിരിക്കുന്ന ദേവി സൗമ്യഭാവത്തിലാണ്. ദേവിയുടെ രണ്ട് വിഗ്രഹങ്ങൾ ശ്രീകോവിലിൽ ഉണ്ട്. മൂലവി ഗ്രഹവും അഭിഷേകവിഗ്രഹവും. മൂലവിഗ്രഹത്തിൽ അഭിഷേകം നടത്താറില്ല. രത്നങ്ങളും സ്വർണ്ണ അങ്കിയും കൊണ്ട് മൂലവിഗ്രഹം അണിയിച്ചൊരുക്കിയിരിക്കുന്നു.