ആശയങ്ങളുടെ ആശാന്മാരാണ് ജെമിനിക്കാർ

ജെമിനിക്കാർ എപ്പോഴും മാറ്റം ആഗ്രഹിക്കുന്ന പ്രകൃതത്തിന് ഉടമയാണ്. വിവിധ മേഖലകളിൽ വൈദഗ്ദ്ധ്യമുള്ളവരും ബുദ്ധിയുടെ അപാരമായ ആശയങ്ങളുടെ ഒരു കെട്ട് ഭാണ്ഡം ശിരസ്സിൽ വഹിക്കുന്നവരുമാണ്. ഏതൊരു വിഷയത്തിലും കൃത്യമായ വീക്ഷണവും ധാരണയും വച്ചുപുലർത്തുന്നവർ. സന്ദർഭത്തിന് അനുയോജ്യമായി സംസാരി ക്കാനും ശരിയായ വാക്കുകൾ പ്രയോഗിക്കാനും പ്രത്യേക വിരുത് ഇവർക്കുണ്ട്. അതു കൊണ്ടുതന്നെ ജെമിനിക്കാരെ ആശയവിനിമയത്തിന്റെ ആശാന്മാർ എന്ന് വിശേഷിപ്പിക്കാം. വാക്കുകൾ കൊണ്ട് ഇന്ദ്രജാലം കാട്ടാൻ കഴിവുള്ളവർ. ഭാഷാശാസ്ത്രത്തിൽ മികവ് പുലർത്തുന്ന ഇവർക്ക് കുറഞ്ഞത് നാല് ഭാഷയെങ്കിലും യഥേഷ്ടം കൈകാര്യം ചെയ്യാനുള്ള കഴിവുണ്ടായിരിക്കും. അതുകൊണ്ടുതന്നെ ജെമിനിക്കാരെ വാക്കുകളുടെയും ഭാഷയുടെയും അധീശന്മാരായി കരുതുന്നു.

- എൻ.ടി. സതീഷ്

ജെമിനി രാശിയിൽപ്പെടുന്നവർ ജൂൺ പതിനഞ്ച് മുതൽ ജൂലൈ പതിനാറുവരെ ജനിച്ചവരാണ്. മിഥുനം രാശിയോട് സൗമ്യമുള്ളവർ. ബുധഗ്രഹമാണ് ഇവരെ നിയന്ത്രിക്കുന്നത്. ബുധനൊരു സ്വഭാവമുണ്ട്. അത് കൂട്ടുകെട്ടുകൊണ്ട് നല്ലവനും മോശക്കാരനുമാണ്. ശുഭാശുഭഗ്രഹങ്ങളുടെ സംസർഗ്ഗത്താൽ സംഭവിക്കുന്നതാണത്. പലപ്പോഴും ഉടമസ്ഥനില്ലാത്ത മൃഗത്തിന്റെ സഞ്ചാരസ്വാതന്ത്ര്യം അത് കാണിക്കും. ഒരുപരിധിവരെ ജെമിനിക്കാരനിലും ആ സ്വഭാവം ദൃശ്യമാണ്. ഒരേ ചിന്തയിലും ജീവിതസാഹചര്യത്തിലും പ്രവൃത്തിയിലും ദീർഘ കാലം കഴിയാൻ ഇഷ്ടപ്പെടുകയില്ല. അതിന് അവരെ പ്രേരിപ്പിക്കുന്ന പ്രധാനഘടകം ഒന്നിലേറെ മേഖലകളിൽ കഴിവ് തെളിയിക്കാനുള്ള ബുദ്ധി ഉള്ളതുതന്നെയാണ്. ഒരു ജോലിയിൽ മുഷിയുമ്പോൾ ഇവർ മറ്റൊരു ജോലി പരീക്ഷിക്കാൻ തയ്യാറാകും. അന്വേഷണാത്മകമായ മനസ്സുള്ളവർ. സത്യം നേടി ആഴങ്ങളിൽ അവിശ്രമം നീന്തുന്നവർ.