32 வருட கல்வி நிர்வாக சேவையிலிருந்து ஓய்வு பெறுகிறார்

மலையகத்தில் கல்விப் பணியோடு சமூகப் பணியையும் இணைத்துக் கொண்டு பயணித்தோர் வெகு சிலரே. அத்தகைய சிலரில் ஒருவராக விளங்கிய ஹட்டன் கல்வி வலயத்தின் பிரதி கல்விப்பணிப்பாளரும், கொட்டகலை அரசினர் ஆசிரியர் கலாசாலையின் முன்னாள் அதிபருமான திருமதி சந்திரலேகா கிங்ஸ்லி கடந்த செவ்வாயன்று (17.06.2025) தனது அறுபதாவது அகவையில் அரச பணியினின்றும் ஓய்வு பெற்றுள்ளார்.

- எம்.அகிலன் - விரிவுரையாளர் (சிறிபாத தேசிய கல்வியியல் கல்லூரி பத்தனை)

இலங்கை கல்வி நிர்வாக சேவையின் முதலாம் தர உத்தியோகத்தரான இவர், கல்விப்பணிக்கு அப்பால் இலக்கிய படைப்பாளராக, பெண்ணுரிமை செயற்பாட்டாளராக, சமூகப்போராளியாக, மார்க்சிஸ கருத்தியல் வாதியாக விளங்கியவர். பேச்சு வன்மை, எதிர்ப்புணர்வு, கொள்கைப்பிடிப்பு என்பவற்றின் மூலம் ஏனைய பெண் ஆளுமைகளிலிருந்து வேறுபட்ட தனித்துவ ஆளுமையாளராக இவர் திகழ்கிறார்.

1965ஆம் ஆண்டு ஹட்டன் தோட்டத்தில் பிறந்த இவரது பெற்றோர் மாயழகு வேலம்மாள் தம்பதியர் ஆவர். ஆறு சகோதர சகோதரிகளைக் கொண்ட குடும்பத்தில் இவர் மூத்த பிள்ளையாவார். தந்தையின் தொழில் நிமித்தம் மஸ்கெலியா லக்ஸபான தோட்டம் இவரது வதிவிடம் ஆகிப்போனதால், தனது ஆரம்பக்கல்வியை லக்ஸபான இலக்கம் 02 வித்தியாலயத்தில் பெற்றுக் கொண்டார். அத்தோடு இடைநிலை மற்றும் உயர்தர கல்வி என்பவற்றை மஸ்கெலியா சென்ஜோசப் கல்லூரியில் பெற்றுக் கொண்டார்.