கண்டு கொள்ளப்படாத பிரெஞ்சு ஆய்வுக்கப்பல்

பிரெஞ்சு கடற்படையின் BEAUTEMPS BEAUPRE என்ற கப்பல், கடந்த 9ஆம் திகதி, 58 மாலுமிகளுடன் கொழும்பு துறைமுகத்திற்கு வந்து சென்றது.

- சுபத்ரா

அந்தக் கப்பல் கொழும்புத் துறைமுகத்தில் தரித்திருந்த போதும் சரி, 13ஆம் திகதி புறப்பட்டு சென்ற பின்னரும் சரி, அதுபற்றி யாரும் பெரிதாக அலட்டிக் கொண்டிருக்கவில்லை.

ஏனென்றால், அது பிராந்திய பூகோள அரசியல் போட்டியில் இருக்கின்ற இந்தியா, சீனாவின் கப்பல் அல்ல.

அது, அந்தக் கப்பல் குறித்த கவனம் வெளித் தரப்பினரால் கவனத்தில் எடுக்கப்படாமல் போனதற்கு காரணமாக இருக்கலாம்.

அமெரிக்கா அல்லது பாகிஸ்தான் கடற்படைக் கப்பலாக இருந்திருந்தால் கூட அதிக கவனத்தைப் பெற்றிருக்கும்.

ஆனால், பிரெஞ்சு கடற்படையின் BEAUTEMPS BEAUPRE கப்பலின் இந்த பயணம் புறக்கணிக்கத்தக்க ஒன்று அல்ல.

ஏனென்றால், அது பிரெஞ்சு கடற்படையில் உள்ள சமுத்திரவியல் ஆய்வு கப்பல்களில் ஒன்று. இந்தியப் பெருங்கடலில் சமுத்திரவியல் ஆய்வில் ஈடுபடுகின்ற அந்தக் கப்பல், சில நாட்கள் ஓய்வெடுத்துக் கொள்வதற்காக, கொழும்புக்கு வந்திருந்தது.

இதன்போது கொழும்பில் இலங்கை கடற்படையின் தேசிய சமுத்திரவியல் பணியகத்தை சேர்ந்த அதிகாரிகளுடன் பிரெஞ்சு கடற்படை அதிகாரிகள் கலந்துரையாடல்களை நடத்தியிருந்தார்கள்.

கிட்டத்தட்ட ஒன்றரை வருடங்களுக்கு பின்னர், இலங்கை கடல் எல்லைக்குள் வந்து சென்றிருக்கின்ற முதலாவது வெளிநாட்டு சமுத்திரவியல் ஆய்வுக் கப்பல் இதுவாகும்.

கடந்த ஆண்டு ஜனவரி மாதம் சீனாவின் Xiang Yang Hong 3, என்ற ஆய்வுக் கப்பல் கொழும்புக்கு வருவதற்குத் திட்டமிட்டிருந்தது.

சீனாவின் ஆய்வுக் கப்பல்கள் இலங்கைக்கு வந்து செல்வது மற்றும் இலங்கை கடற்பரப்பில் ஆய்வுகளை மேற்கொள்வதற்கு இந்தியா எதிர்ப்பு வெளியிட்டதை தொடர்ந்து, கடந்த ஆண்டு ஆட்சியில் இருந்த ரணில் விக்கிரமசிங்க அரசாங்கம், வெளிநாட்டு ஆய்வுக் கப்பல்கள் இலங்கை கடற்பரப்பில் ஆய்வுகளை மேற்கொள்வதற்கு ஒரு வருடத் தடையை விதித்தது.

இந்தத் தடை கடந்த டிசம்பர் 31 ஆம் திகதியுடன், முடிவுக்கு வந்து விட்டது.

அதனை, தற்போதைய அரசாங்கம் நீக்கவும் இல்லை. அதுபற்றி அலட்டிக் கொள்ளவும் இல்லை.

ரணில் விக்கிரமசிங்க அரசாங்கம் விதித்த தடை, காலாவதியானதுடன் எந்த நடவடிக்கையும் எடுக்காமல் ஒதுங்கிக் கொண்டது.

இதன் மூலமாக சீன ஆய்வுக் கப்பல்களுக்கு தேசிய மக்கள் சக்தி அரசாங்கம் கதவுகளை திறந்து விடுகிறது என்ற கருத்து நிலவியது.