யாழ். பல்கலைக்கும் தேசியத்துக்கும் குரல் கொடுத்தவர் சுவாமி விபுலானந்தர்

யாழ்ப்பாணத்துக் கென்று ஒரு தனியான பல்கலைக்கழகம் வேண்டும் என்று முதன்முதலில் குரல் கொடுத்தவர் சுவாமி விபுலானந்த அடிகளே. அதேபோன்று தேசியம் பற்றி முதன் முதலில் பேசியவரும் அவரே.

- 

சுவாமி விபுலானந்தர் போல் ஒரு தமிழறிஞர் உலகில் பிறக்கவே இல்லை. அவர் ஓர் அற்புதமான பிறவி.

இவ்வாறு கனடாவிலிருந்து வருகைதந்த அண்ணாமலை பல்கலைக்கழக முதல் தமிழ்ப் பேராசிரியர் இளையதம்பி பாலசுந்தரம், தான் பிறந்த காரைதீவு மண்ணில் பேசுகையில் தெரிவித்தார்.

காரைதீவில் பிறந்து தற்சமயம் கனடாவில் வாழ்ந்து வரும் பேராசிரியர் பாலசுந்தரம், 40 வருடங்களுக்குப் பிற்பாடு தனது பிறந்த ஊரான காரைதீவு மண்ணுக்கு புதன்கிழமை(14) தனது துணைவியார் பேராசிரியர் விமலாம்பிகையுடன் விஜயம் செய்தார்.

அவருக்கு காரைதீவு விபுலானந்த ஞாபகார்த்த பணி மன்றம் பாரிய வரவேற்பளித்தது.

முன்னதாக அவர்கள் சுவாமி விபுலானந்த அடிகளாரின் திருவுருவச்சிலைக்கு மலர் மாலை அணிவித்தார்கள். பின்னர் அடிகளார் பிறந்த இல்லத்தில் விசேட பூசை நடைபெற்று அங்குள்ள அரும்பொருள் காட்சியகத்தைப் பார்வையிட்டனர்.