వాడినపూలు వికసించునా?

కథ

- బుద్ధవరపు కామేశ్వరరావు

ఆ రోజు హైదరాబాద్లోని సత్కళా ఇండస్ట్రీ వారి ఆవరణలో ఆ కంపెనీ వ్యవస్థాపకులు ' కళ్యాణరావు గారి జయంతి వేడుకలు జరుగుతున్నాయి. కంపెనీ మేనేజర్ కృష్ణమూర్తి గారు సభను ప్రారంభిస్తూ"

అందరిలాగే తాను కూడా ఇది నావల్ల అవదేమో.. అని అనుకోకుండా, కాకినాడకు చెందిన కళ్యాణరావు గారు పాతికేళ్ల క్రితం, భార్యా బిడ్డలతో మన నగరానికి వచ్చి ఓ చిన్న కుటీర పరిశ్రమలా ఈ సంస్థను ప్రారంభించారు. ఆయన వ్యాపార దక్షత మూలంగా ఈరోజు ఈ పరిశ్రమ ఇన్ని వందల మందికి జీవనోపాధి కల్పిస్తోంది. అయితే ఐదు సంవత్సరాల క్రితం ఆ భార్యాభర్తలు ఓ ప్రమాదంలో మరణించడం వల్ల, వారి పిల్లలు ఈ కంపెనీకి డైరెక్టర్లుగా ఉంటూ, ఆయన లేని లోటు తెలియకుండా సంస్థను ముందుకు నడిపిస్తున్నారు. ఇప్పుడు వారి అబ్బాయి సతీష్ని మాట్లాడవలసిందిగా కోరుకుంటున్నాను” అని కూర్చున్నారు కృష్ణమూర్తి.

సతీష్ మాట్లాడుతూ “కాకినాడలో ఓ చిన్న మెడికల్ షాపు నడుపుతున్న మా నాన్నగారికి మా చెల్లాయ్ కళ పుట్టిన తరువాత దశ తిరిగిందిట.

అందుకే ఓ మిత్రుని సలహాతో ఇక్కడికి వచ్చి, మా ఇద్దరి పేర్లు కలిసోచ్చేలా సత్కళా ఫార్మా పేరుతో ఈ సంస్థ ప్రారంభించారు. ఆయన జ్ఞాపకార్థం ప్రతీ సంవత్స రంలాగే ఈ సంవత్సరం కూడా అందరికీ రెండు నెలల జీతం అదనపు బోనస్ గా ప్రకటిస్తున్నాను" హర్షధ్వానాల మద్య చెప్పాడు సతీష్.

ఆ రోజు సాయంత్రం కార్లో ఇంటికి వెళ్తూ, ఉదయం నుండి జరిగిన సంఘటనలు ఆనందంగా చర్చించుకుంటున్నారు అన్నా, చెల్లెలు.

అయితే ఆ ఆనందం తాత్కాలికమేననీ, తాము నిజంగానే బాధపడే రోజు ఓ రెండు వారాలలో వస్తోందని పాపం వాళ్లకు ఆ సమయంలో వాళ్లకు తెలియదు.

ఓ రెండు వారాలు తరువాత ఆ రోజు మధ్యాహ్నం తనను కలుసుకోవడానికి ఎవరో అమ్మాయి వచ్చిందని తెలిసిన కళ, వెయిటింగ్ రూమ్ వైపు వెళ్లింది. బహుశా చెల్లెలు తన కోసం ఏదైనా సంబంధం తెచ్చిందేమోనని ఆమెను చూడడానికి దొంగతనంగా వెంబడించాడు సతీష్.

అచ్చు తనలాగే ఉన్న ఆమెను చూసి ఆశ్చర్యపోయింది కళ. అదే పరిస్థితి ఎదుర్కొన్నాడు సతీష్ కూడా. కాసేపటికి సర్దుకుని "ఎవరండీ మీరు? ఎవరు కావాలి?" అడిగింది.

"అక్కా! నా పేరు అంజని. డైరెక్ట్ పాయింట్లోకి వచ్చేస్తున్నా. వినడానికి విడ్డూరంగా ఉన్నా ఇది వాస్తవం. మనం కవల పిల్లలం అక్కా! ఈ విషయం మొన్ననే మా అమ్మ కమల ద్వారా తెలిసింది" అంది.