ఇంగ్లీషులో రాసిన తొలి భారతీయ రచయిత్రి

మన దేశంలో పందొమ్మిదో శతాబ్దంలో ఇంగ్లీషు భాషలో 'సగుణ, 'కమల' అనే నవలలు రాసి ప్రసిద్ధి చెందిన రచయిత్రి కృపాబాయి సత్యనాథన్.

- - యామిజాల జగదీశ్

మన దేశంలో పందొమ్మిదో శతాబ్దంలో ఇంగ్లీషు భాషలో 'సగుణ, 'కమల' అనే నవలలు రాసి ప్రసిద్ధి చెందిన రచయిత్రి కృపాబాయి సత్యనాథన్. భారతదేశంలో ఇంగ్లీషులో మొట్టమొదటగా నవలలు రాసిన మహిళగా చరిత్ర పుటలకెక్కారు. తన సొంత కథను చెప్తున్నట్టుగానే 'సగుణ' నవలను రాసిన కృపాబాయి చెన్నైలో ఉండేవారు.ఈ నవల రాస్తున్నప్పుడు ఆమె వయస్సు ఇరవై అయిదేళ్ళు. ఆమె 1862లో ముంబైలో మరాఠీ భాషను మాట్లాడే బ్రాహ్మణ కుటుంబంలో జన్మించారు. విద్యావంతులు. హరిబంధు, రాధాబాయి దంపతులకు కృపాబాయి పదమూడో సంతానం. మద్రాస్ మెడికల్ కాలేజీలో మొదటిసారిగా ఆడవాళ్ళకు ప్రవేశం కల్పించిన కాలంలో కృపాబాయికి అక్కడ చదివే భాగ్యం కలిగింది. అయితే ఎక్కడ బస చేయాలన్నది సమస్యగా మారింది.

చెన్నైలో తమిళం మాట్లాడే హిందువుల కుటుంబంలో జన్మించిన తిరువేంకట నాయకర్ మతం మారి ఓ పాఠశాల నడుపుతున్నారు. ఆయన భార్య అన్నల్ మాణిక్యంతో కలిసి మత ప్రచారం చేస్తుండేవారు. వారితో కృపాబాయి కుటుంబానికి మంచి పరిచయం ఉండేది. దీంతో వారికి ఉత్తరం రాశారు. దానికి జవాబు రాస్తూ తిరువేంకట నాయకర్ కృపాబాయి తమ ఇంటే ఉండి మెడికల్ కాలేజీలో చదవవచ్చని చెప్పారు.