శ్రీ వినాయక వ్రతకల్పం

శ్రీ విఘ్నేశ్వర పూజా ద్రవ్యములు

- 

విద్యార్థులు తమ పాఠ్యపుస్తకాలు, పెన్ను, పెన్సిల్: వ్యాపారులైతే వారి వ్యాపార లెక్కల పుస్తకాలు, ఏ వ్యాపారం చేస్తుంటే ఆ వస్తువులు.. వీటికి గంధం, బొట్టు పెట్టి దేవుడి దగ్గర ఉంచాలి. పూజానంతరం అక్షతలు వాటిపై వేసి నమస్కరించాలి.

పసుపు, కుంకుమ, వినాయక ప్రతిమ, అగరువత్తులు, హారతి కర్పూరం, అక్షతలు, బియ్యం, దీపం కుందులు, వత్తులు, అగ్గిపెట్టె, ఆవునేయి లేదా నువ్వుల నూనె, పంచామృతం (ఆవుపాలు, పెరుగు, నేయి, తేనె, పంచదార), తమలపాకులు, పోకచెక్కలు, పువ్వులు, పండ్లు, వస్త్రం, యజ్ఞోపవీతం, గంధం, పంచపాత్ర, ఉద్ధరిణి(చెంచా), పళ్ళెం, గరిక, కొబ్బరికాయలు, నైవేద్య పదార్థములు, పత్రి, పాలవెల్లి.

నైవేద్యం

ఉండ్రాళ్లు-21, వడపప్పు, పానకం, అటుకులు, కొబ్బరి, ఆహార పదార్థాలు.

మట్టితో చేసిన గణపతి విగ్రహాన్ని పూజించడం వలన కరువు కాటకాలు రాకుండా పంటలు సమృద్ధిగా పండుతాయని ప్రతీతి. వ్యవసాయ అభివృద్ధి కలుగుతుంది.

బంగారు గణపతి ప్రతిమ ఐశ్వర్యాభివృద్ధిని, వెండి ప్రతిమ ఆయురారోగ్యాన్నీ, రాగి ప్రతిమ సంకల్ప సిద్ధిని, శిలాప్రతిమ మోక్ష, జ్ఞానాలను అనుగ్రహిస్తాయని పురాణాలు చెబుతున్నాయి.

గణేశుని పూజ

(ముందుగా పీట మీద ముగ్గు వేసి బియ్యం పోసి, దాని మీద వినాయకుడి బొమ్మను ఉంచాలి. పైన పాలవెల్లి కట్టాలి. పసుపుతో వినాయకుణ్ణి చేయాలి. పూజ చేసేవాళ్లు. బొట్టు పెట్టుకుని, దీపారాధన చేసి వినాయకునికి నమస్కరించి పూజ ప్రారంభించాలి.

ముందుగా పసుపుతో చేసిన వినాయకుణ్ణి పూజించాలి.

ఓం శ్రీ మహాగణాధిపతయే నమః

దీపారాధన: ఈ క్రింది శ్లోకాన్ని చదువుతూ దీపాన్ని వెలిగించి, దీపం కుంది వద్ద అక్షతలు ఉంచి నమస్కరించాలి.

శ్లో॥ భోదీపదేవి రూపస్త్యం, కర్మసాక్షి యావత్పూజాం కరిష్యామి తావత్వం సిద్ధిదో భవ ॥ దీపారాధన ముహూర్తస్తు సుముహూర్తోస్తు ॥

పరిశుద్ధి: (పంచపాత్రలోని నీటిని ఉద్ధరిణి(చెంచా)తో తీసుకుని కుడి చేతి బొటనవేలు, మధ్య, ఉంగరపు వేళ్ళతో నీటిని ఈ క్రింది మంత్రం చెబుతూ తలపై చల్లుకోవాలి)

అపవిత్రః పవిత్రో వా సర్వావస్థాంగతోపి వా ! యస్మరేత్ పుండరీకాక్షం సబాహ్యాంతరశ్శుచిః ॥ పుండరీకాక్ష, పుండరీకాక్ష, పుండరీకాక్షాయ నమః శ్రీరస్తు శుభమస్తు అవిఘ్నమస్తు

శ్రీ గణేశాయ నమః