ఏదీ! తెలుగు?

ఆంగ్లభాషలో విద్యాబోధన పట్ల తెలుగు మేధావులను 4వ ప్రపంచ మహాసభల సందర్భంలో నిరసన గళం వెల్లువెత్తి కదిలించింది.

- జయసూర్య

ఆంగ్లభాషలో విద్యాబోధన పట్ల తెలుగు మేధావులను 4వ ప్రపంచ మహాసభల సందర్భంలో నిరసన గళం వెల్లువెత్తి కదిలించింది. 2019 సంవత్సరాన్ని అంతర్జాతీయ మాతృభాషల పరిరక్షణ సంవత్సరంగా, ఐక్కరాజ్య సమితి ప్రకటించిన నేపథ్యంలో నాటి మహసభల వేదిక గుండె తలుపులు తట్టే లక్ష్యంతో ప్రతిధ్వనించింది.

ఉభయ తెలుగు రాష్ట్రాల కవులు, రచయితలు, భాషాభిమానులు, వివిధ రంగాల మేధావులు, రాజకీయ రంగ ప్రముఖులు సైతం అమ్మభాషను రక్షించుకోవలసిన పరిస్థితి తల ఎత్తిందని నాడు ఆందోళన వ్యక్తం చేసారు.

కొమర్రాజు, గిడుగు, సురవరంలను తెలుగుజాతి వైతాళికులుగా, అమ్మభాషకు వున్న ఘన వారసత్వ ప్రాభవాన్ని నాటి ప్రసంగ ప్రముఖులు గుర్తు చేసారు. ప్రతి ఒక్కరూ యిక భాషా సత్యాగ్రహులుగా మారాల్సిన సమయం ఆసన్నమైందని, ఆంగ్ల బానిసత్వంలోకి మనల్ని నెట్టివేసే విధంగా మాతృభాషను నిషేధించే దుస్థితి ప్రాప్తించిందని మహాసభ ఆవేదన వ్యక్తం చేసింది. ప్రాథమిక విద్యకు మాతృభాషను మాధ్యమంగా ఉంచాలని, పిల్లలలో మాతృభాష పట్ల ప్రేమ, గౌరవం పెరిగేలా ద్వేషరహితమైన విద్యావ్యవస్థ ఉండాలని మహాసభ ఆకాంక్షించింది. ఇంటి తల్లిపలుకును, బడిచదువు భాషగా, ఏలుబడి భాషగా వర్ధిల్ల చేయాలనే తపన సర్వత్రా నాటి ప్రభుత్వ నిర్ణయం పట్ల అసంతృప్తి, నిరసన, ఆగ్రహావేశాలు ప్రదర్శింప చేసారు.

ఊరూరా తెలుగు వేదికల ఏర్పాటుకు పిలుపు యిచ్చారు. బలవంతంగా ఆంగ్లంలో చదివించడం వల్ల ప్రాథమిక హక్కుల ఉల్లంఘన అవుతుందని హెచ్చరించారు. 11 తీర్మానాలు ఆమోదింపబడి 4వ ప్రపంచ తెలుగు మహాసభ నిర్మాణాత్మక ఉద్యమ సారథ్యానికి నడుం బిగించింది.