స్త్రీలను కించపరిచే పాఠ్యాంశాలు

వరుసగా జరిగిన మానవవాదుల హత్య లు, హేతువాదు లపై దాడులు, ఆలోచనా పరులైన రచయితలపై ఒత్తిళ్లు, నోట్లరద్దు, జియసి, బ్యాంకుల దివాలా, రైతుల లాంగ్ మార్చ్వంటి వన్నీ భవిష్యత్తు చీకటిగా ఉండబోతోందని హెచ్చరిస్తున్నాయి.

- డాక్టర్ దేవరాజు మహారాజు

ప్రమాద ఘంటికలు మోగుతున్నాయి. అందుకు కారణం కేంద్రమంత్రుల ఉపన్యాసాలు ఒక కారణమైతే, వివిధ రాష్ట్రాలలో పాఠ్యపుస్తకాలలోని అంశాలు మరొక కారణం! దేశంలోని వివిధ రాష్ట్రాల్లో పాఠశాలల పాఠ్యపుస్తకాల్లో అసంబద్ధమైన అంశాలు, అసత్యాలు ఎలా చోటు చేసుకున్నాయో గమనించండి.

పదమూడు, పదిహేను సంవత్సరాల మధ్య వయసున్న బాలబాలికలకు తప్పుడు సమాచారం అందించడమంటే, వారిని తప్పుడు వ్యక్తులుగా తయారు చేయడమే కదా? గుజరాత్లో యాభైవేలమంది చదువుకునే ఒక సామాన్యశాస్త్ర పాఠ్యగ్రంథంలో రెండవ ప్రపంచయుద్ధం జరుగుతున్న సమయంలో జపాన్, అమెరికాపై అణుయుద్ధం ప్రకటించిందని ఉంది. వక్రీకరించన చారిత్రక అంశాలు చదువుకుని భావిభారత పౌరులు ఎలా తయారవుతారన్నది ఆందోళన పడాల్సిన విషయం. రాజస్థాన్లో బోధిస్తున్న ఒక పాఠ్యగ్రంథంలో స్త్రీలను కించపరిచే పదాలను వాడారు.