கூட்டணி ஆட்சியா?, கூட்டணி அரசா?

தமிழகத்தில் கூட்டணி ஆட்சி என்ற மத்திய அமைச்சர் அமித் ஷாவின் தேர்தல் வியூகம் வெற்றி பெறுமா என்பது அரசியல் வட்டாரங்களில் விவாதப் பொருளாகியிருக்கிறது. அதிமுகவின் மௌனமும் பாஜக மேலிடத்தின் நிலைப்பாடும் இந்த விவாதத்தைத் தொடர்ந்து பேசுபொருளாக்கி இருக்கிறது.

- பீ. ஜெபலின் ஜான்

2024 மக்களவைத் தேர்தலில் முறிந்த அதிமுக-பாஜக கூட்டணி, கடந்த மார்ச்சில் தில்லியில் மத்திய உள்துறை அமைச்சர் அமித் ஷாவுடன் அதிமுக பொதுச் செயலர் எடப்பாடி கே. பழனிசாமி தலைமையிலான முக்கிய நிர்வாகிகள் நடத்திய பேச்சுவார்த்தைக்குப் பிறகு மீண்டும் ஏற்பட்டது.

எடப்பாடி பழனிசாமியை சந்தித்த பிறகு அமித் ஷா தனது 'எக்ஸ்' பக்கத்தில் தமிழகத்தில் தேசிய ஜனநாயக கூட்டணி ஆட்சி அமைக்கும் எனப் பதிவிட்டார். ஆட்சி அமையும் என்று சொன்னாரே தவிர, அரசு அமையும் என்று சொல்லவில்லை. அதற்குள், அமித் ஷா 'கூட்டணி ஆட்சி' என்று அறிவித்துவிட்டார் என்று ஊடகங்களில் பரப்புரை மேற்கொள்ளப்பட்டது.

இந்நிலையில் சென்னைக்கு வந்த அமித் ஷாவை எடப்பாடி பழனிசாமி சந்தித்துப் பேசிய பிறகு அவருடன் சேர்ந்து நடந்த செய்தியாளர் சந்திப்பில், தமிழகத்தில் தேசிய ஜனநாயக கூட்டணி ஆட்சியைக் கைப்பற்றும் என்றும், பாஜக -அதிமுக கூட்டணி ஆட்சி அமைக்கும் என்றும் அமித் ஷா தெரிவித்தார்.

அடுத்த நாளே, அமித் ஷா கூறியது 'கூட்டணி ஆட்சிதான்', 'கூட்டணி அரசு அல்ல' என எடப்பாடி பழனிசாமி விளக்கம் அளித்தார். 2021-வரையில் எடப்பாடி பழனிசாமி தலைமையில் அமைந்த அதிமுக அரசும் கூட தேசிய ஜனநாயகக் கூட்டணியில்தான் இருந்தது என்பதையும் அவர் அப்போது குறிப்பிட்டார்.

இத்தகைய சூழலில்தான் அமித் ஷா சில நாளிதழ்களுக்கு அளித்த பேட்டியில் தமிழகத்தில் கூட்டணி ஆட்சி அமையும் எனத் தெரிவித்து, ஓயாத கூட்டணி ஆட்சி சர்ச்சைக்கு உயிர் கொடுத்துள்ளார். இந்த விஷயத்தில் இப்போதும் எடப்பாடி பழனிசாமியோ அவரது தரப்போ எந்தக் கருத்தையும் தெரிவிக்கவில்லை. பாஜகவிலும் அதே நிலைதான்.