இலங்கையில் போசாக்குக் குறைபாடுள்ள சிறுவர்களின் உளவியல் தாக்கங்கள்

இலங்கையின் எதிர்காலத் தூண்களாகத் திகழ வேண்டிய சிறுவர்கள் போசாக்குக் குறைபாட்டின் கொடிய பிடியில் சிக்கித் தவிப்பது ஒரு சமூக ரீதியிலான அவலமாகும். ஒரு உளவியல் துறை மாணவி என்ற வகையில், போசாக்குக் குறைபாடு என்பது வெறும் உடலியல் ரீதியான சவால்களை மட்டும் கொண்டதல்ல மாறாக அது ஒரு குழந்தையின் ஒட்டு மொத்த உளவியல் ஆரோக்கியம், அறிவாற்றல் வளர்ச்சி, சமூகப் பிணைப்புகள் மற்றும் எதிர்கால வாய்ப்புகள் எனப் பலவற்றையும் பாதிக்கக் கூடிய ஒரு ஆழமான உளவியல் சிக்கல் என்பதை நான் ஆழமாக உணர்கிறேன். போசாக்குக் குறைபாடுள்ள சிறுவர்கள் எதிர்கொள்ளும் சவால்கள், உலகளாவிய ரீதியிலும் இலங்கையிலும் அதன் பரவல், குறிப்பாகப் பாதிக்கப்பட்ட மாவட்டங்கள், மற்றும் இந்த நிலையின் உளவியல் தாக்கங்கள் குறித்து இக் கட்டுரையில் விரிவாக ஆராய்வோம்.

- சயந்தினி ஆனந்த ராசா, உளவியல் சிறப்புக்கலை, யாழ். பல்கலைக்கழகம்

“ஆரோக்கியமே உண்மையான செல்வம்” என்ற ஒரு பழைமையான கிரேக்கப் பழமொழி, உடல் நலத்தின் முக்கியத்துவத்தை அழுத்தமாக வலியுறுத்திறது. ஒரு குழந்தையின் ஆரோக்கியமான வளர்ச்சிக்கு சரியான ஊட்டச்சத்து அத்தியாவசியம். போசாக்குக் குறைபாடு என்பது உடலின் சீரான வளர்ச்சிக்கும், செயல் பாட்டிற்கும் தேவையான அத்தியாவசிய ஊட்டச்சத்துக்கள் போதிய அளவில் கிடைக்காத ஒரு நிலையைக் குறிக்கிறது. இது உயரம் குறைதல் (stunting), மெலிந்திருத்தல் (wasting), எடைகுறைதல் (underweight) மற்றும் நுண்ணூட்டச்சத்து குறைபாடுகள் எனப் பலவடிவங்களில் வெளிப்படலாம்.

உலகளாவிய போசாக்குக் குறைபாட்டின் நிலை

உலகளவில், போசாக்குக் குறைபாடு ஒரு பெரும் பொது சுகாதாரப் பிரச்சினையாக வேநீடிக்கிறது. யுனிசெஃப் (UNICEF) மற்றும் உலக சுகாதார நிறுவனம் (WHO)ஆகியவற்றின் அறிக்கைகளின்படி, உலகளவில் சுமார் 149 மில்லியன் ஐந்து வயதுக்குட்பட்ட குழந்தைகள் வளர்ச்சிகுன்றியவர்களாக (stunted) உள்ளனர். இது அவர்களின் வயதுக்கு ஏற்ற உயரத்தைப் பெறமுடியாமல் இருப்பதைக் குறிக்கிறது. மேலும், 45 மில்லியன் குழந்தைகள் மெலிந்த நிலையில் (wasted) உள்ளனர். அவர்களில் 13.6 மில்லியன் குழந்தைகள் கடுமையான மெலிந்த நிலையில் உள்ளனர். இது மரண அபாயத்தை அதிகரிக்கும் ஒரு நிலை. இந்த புள்ளி விவரங்கள் போசாக்குக் குறைபாடு உலகின் பல பாகங்களில் மில்லியன் கணக்கான குழந்தைகளின் வாழ்க்கையைப் பாதிக்கிறது என்பதைக் காட்டுகிறது. “பசியால் வாடும் ஒருவருக்கு, ஒரு துண்டு ரொட்டி என்பது ஒரு சாம்ராஜ்யத்திற்கு சமம்” என்று மகாத்மாகாந்தி குறிப்பிட்டது போல, உலகம் முழுவதும் உணவுப் பாதுகாப்பு இல்லாத பல குடும்பங்களில் குழந்தைகளுக்குப் போதுமான ஊட்டச்சத்து கிடைப்பதே இல்லை.