સાબરમતી નદીનું રૌદ્ર સ્વરૂપ શહેરના ૧૯ વિસ્તાર હાઈ એલર્ટ પર

વાસણા બેરેજના ર૭ દરવાજા છ ફૂટ સુધી ખોલાયાઃ પોલીસ-રેસ્ક્યુ ટીમો સ્ટેન્ડબાય

- 

સાબર તારાં વહેતાં પાણી...'. ઘણા લાંબા સમય પછી સાબરમતી નદીએ રૌદ્ર સ્વરૂપ બતાવ્યું છે, જેને જોવા માટે લોકો દૂર-દૂરથી આવી રહ્યા છે. મેઘરાજાની તોફાની બેટિંગ બાદ સાબરમતી નદીમાં સતત પાણી છોડવામાં આવી રહ્યું છે, જેના કારણે સાબરમતી નદી બે કાંઠે વહી રહી છે. નદીમાં છોડવામાં આવેલાં પાણીના પગલે અમદાવાદ શહેર અને જિલ્લામાં એલર્ટ જારી કરવામાં આવ્યું છે તથા પોલીસ તેમજ રેસ્ક્યુ ટીમોને સ્ટેન્ડબાય કરી દેવાઈ છે.

સાબરમતી નદીમાં પાણીનું સ્તર ઊંચું આવતાંની સાથે જ અમદાવાદ મ્યુનિસિપલ કોર્પોરેશન દ્વારા રિવરફ્રન્ટ પર લોકોની અવરજવર માટે પ્રતિબંધ મૂકી દેવાયો છે. આવનારા સમયમાં પાણી વોકવે સુધી આવી જાય તેવી સંભાવના છે, જેને લઈ આ નિર્ણય લેવાયો છે. છેલ્લા ત્રણ દિવસથી નદીમાં પાણી છોડવામાં આવી રહ્યું છે, જેના કારણે સાબરમતી નદી તેના ભયાનક સ્વરૂપે વહી રહી છે.