Doen iets - ons mense voel nie veilig nie

Inwoners van Rustenburg is na twee weke steeds verslae oor die skietery helder oordag toe 'n bejaarde egpaar op 'n Saterdagmiddag ten aanskoue van talle lede van die publiek en klante van 'n prominente inkoopsentrum deur gewapende mans doodgeskiet is.

- 

Die skietery is volgens allerlei gerugte deur 'n woordewisseling tussen die egpaar en hul aanvallers voorafgegaan. Hoewel inligting oor die presiese oorsaak van die skietery beperk is, het baie mense vanselfsprekend aanvaar dat skeltaal en oor-en-weer-beledigings een van die redes vir die tragedie was. Dit is egter nie die punt wat ons hier wil aanspreek nie.

Daar is seker min mense wat 30 jaar na 'n nuwe demokrasie nog nie besef dat ons as't ware in 'n totaal ander land woon nie. As sulks, is dit nie noodwendig 'n slegte ding nie - daar is baie voordele daaraan verbonde om na jare van politieke isolasie weer met ope arms deur die internasionale gemeenskap verwelkom te word.