Herandien se moordenaar kry lewenslank

"Ek het nie vir Abraham doodgemaak nie. Ek het niks aan hom gedoen nie.

- GARNETT WICOMB EN LIEZL VAN NIEKERK

So het Francisco Erasmus (50) van George, Maandagoggend, 2 Junie, ter strafversagting voor vonnisoplegging aan die hof gesê.

Erasmus is verlede Donderdag, 29 Mei, in die Oudtshoorn-streekhof aan moord met voorbedagte rade op die 60-jarige Abraham Herandien, 'n veewagter van Bloupunt, Dysselsdorp, skuldig bevind en Maandag lewenslange gevangenisstraf opgelê.

Die liggaam van Herandien is op Dinsdag 21 Maart 2023, met veelvuldige steekwonde deur verkeersbeamptes in 'n motor, wat deur Erasmus bestuur was, op die De Rust-pad gevind. Hy het gesê dat hy met 'n passasier op pad was na die hospitaal.

Erasmus, wat homself verdedig het, het die hof gevra om in ag te neem dat hy tans 'n vonnis van 32 jaar uitdien en reeds 50 jaar oud is. Voorts is sy ma baie siek en het hy ook 'n vrou en dogter vir wie hy moet sorg.

Die staatsaanklaer, adv. Michelle Weyers, het die hof versoek om nie af te wyk van die maksimum vonnis nie omdat Erasmus aan 'n baie ernstige misdryf skuldig bevind is en geen berou toon nie.