கலவரத்தில் பலி 30 ஆக உயர்வு: நேபாளத்தில் முன்னாள் நீதிபதி தலைமையில் இடைக்கால ஆட்சி! போராட்டக்காரர்கள் முழு ஆதரவு !!

நேபாளத்தில் சமூக வலைதளங்களுக்கு விதிக்கப்பட்ட தடையை எதிர்த்து தொடங்கிய இளைஞர்கள் போராட்டம், 2 நாட்களில் ஆட்சி கவிழ்ப்புக்கு வித்திட்டது. நாடாளுமன்றம் தொடங்கி பிரதமர், அமைச்சர்களின் வீடுகள் பலவற்றையும் போராட்டக்காரர்கள் தீ வைத்துக் கொளுத்தினர்.

- 

நேபாள பிரதமராக இருந்த சர்மா ஒலி ராஜினாமா செய்ததைத் தொடர்ந்து, ராணுவம் தற்போது ஆட்சிப் பொறுப்பை கைப்பற்றி சட்டம் ஒழுங்கை காக்க முற்பட்டுள்ளது. இந்நிலையில், வங்கதேச பாணியில் நேபாள முன்னாள் தலைமை நீதிபதி சுஷீலா கார்கி தலைமையில் இடைக்கால அரசை அமைக்க போராட்டக்காரர்கள் ஒருமித்த ஆதரவு தெரிவித்துள்ளனர்.

நேபாளத்தில் பிரதமராக இருந்த கே.பி. சர்மா ஒலி, தொலைத்தொடர்பு மற்றும் தகவல் தொழில்நுட்பத் துறையின் விதிமுறைகளுக்கு ஒப்புக் கொள்ளாத பேஸ்புக், மெசஞ்சர், இன்ஸ்டாகிராம், யூடியூப், வாட்ஸ்அப், எக்ஸ், லிங்க்ட்இன், ஸ்னாப்சாட், ரெடிட், த்ரெட்ஸ், வீசாட், க்ளப்ஹவுஸ் உள்ளிட்ட 26 சமூக வலைதளங்களை அதிரடியாக முடக்கினார்.
இந்த விவகாரம் ஜென் இசட் எனப்படும் இளம் தலைமுறையினர் இடையே கொந்தளிப்பை ஏற்படுத்தியது. தடை செய்ய வேண்டியது சமூக வலைதளங்களை அல்ல, ஊழல் அரசைத்தான் என்று கூறி பல்லாயிரக்கணக்கான இளைஞர்கள் போராட்டத்தில் குதித்தனர்.

தடை உத்தரவையும் மீறி தேசிய கொடிகளை கைகளில் ஏந்திக்கொண்டு இளைஞர்கள் பல்வேறு நகரங்களில் போராட்டங்களில் ஈடுபட்டனர். இதில் வன்முறை கலவரம் ஏற்பட்டதால், போலீசார் நடத்திய துப்பாக்கிச் சூட்டில் முதல் நாளில் 20 பேர் பலியாகினர். இதனால் போராட்டம் தீவிரமடைந்தது. இதனால் ஆடிப்போன சர்மா ஒலி அரசு சமூக வலைதளங்களுக்கு விதித்த தடையை நீக்கியது. ஆனாலும் போராட்டம் அடங்கவில்லை.

"ஊழல் புரியும் பிரதமர் சர்மா ஒலி அரசை கவிழ்க்கும் வரை போராட்டம் ஓயாது" என்று கூறி இளைஞர்கள் தொடர் போராட்டத்தில் ஈடுபட்டனர். இதில் மேலும் சிலர் கொல்லப்பட்டதால், ஆவேசமடைந்த போராட்டக்காரர்கள் பொதுச் சொத்துக்களை சூறையாடி தீ வைக்கத் தொடங்கினர். பிரதமர் சர்மா ஒலி, உள்துறை மந்திரி ரமேஷ் லோகாக், நேபாள முன்னாள் பிரதமர்கள் பிரசாந்தா, ஜலநாத் கனால் மற்றும் ஷேர் பகதூர் துபா உள்ளிட்ட அனைவரது வீடுகளையும் போராட்டக்காரர்கள் தீக்கிரையாக்கினர்.