ஆபரேஷன் சிந்தூர்: எதிர்க்கட்சிகள் அமளி

முதல் நாளிலேயே முடங்கியது மக்களவை

- 

புது தில்லி, ஜூலை 21: நாடாளுமன்ற மழைக்காலக் கூட்டத் தொடர் திங்கள்கிழமை தொடங்கிய நிலையில், ஆபரேஷன் சிந்தூர் நடவடிக்கை குறித்து உடனடி விவாதம் கோரி, இரு அவைகளிலும் எதிர்க்கட்சிகள் அமளியில் ஈடுபட்டன. மக்களவை நாள் முழுவதும் ஒத்திவைக்கப்பட்டதால், அதன் அலுவல்கள் முடங்கின.

பரபரப்பான அரசியல் சூழலில், நாடாளுமன்ற மழைக்கால கூட்டத் தொடர் திங்கள்கிழமை தொடங்கியது. ஒரு மாத காலம் நடைபெற விருக்கும் இக்கூட்டத் தொடரின் முதல் நாளில் ஆபரேஷன் சிந்தூர் விவகாரம் முக்கியமாக எதிரொலித்தது.

மக்களவை காலை 11 மணியளவில் கூடியதும், முன்னாள் எம்.பி.க்கள் 8 பேரின் மறைவுக்கு இரங்கல் தெரிவிக்கப்பட்டது. கடந்த ஏப்ரலில் நடந்த பஹல்காம் பயங்கரவாதத் தாக்குதலுக்கு கண்டனம் தெரிவிக்கப்பட்டு, அதில் உயிரிழந்த 26 பேருக்கும் அஞ்சலி செலுத்தப்பட்டது. அகமதாபாத் விமான விபத்தில் உயிரிழந்தோருக்கும் மக்களவை அஞ்சலி செலுத்தியது.