மின்வாரியத்தின் கடன் ரூ.2.47 லட்சம் கோடி

தமிழ்நாடு மின் வாரியத்தின் கடன் தொகை ரூ.2.47 லட்சம் கோடியாக இருப்பதாக மின் துறை அமைச்சர் சி.டி.ஆர்.நிர்மல் குமார் வெளியிட்ட வெள்ளை அறிக்கையில் தெரிவிக்கப்பட்டுள்ளது.

- 

மின்வாரியத்தில் 65,921 காலிப் பணியிடங்கள் இருப்பதாகவும் அதில் கூறப்பட்டுள்ளது.

மின்வாரிய நிதிநிலை, வருவாய்- செலவினம், கடன் சுமை, மின்கொள் முதல் நடைமுறைகள் உள்ளிட்ட விவரங்களை விளக்கும் வெள்ளை அறிக்கையை மின்வாரிய தலைமை அலுவலகத்தில் மின் துறை அமைச்சர் நிர்மல்குமார் வியாழக்கிழமை வெளியிட்டார்.

பின்னர், அவர் செய்தியாளர்களிடம் கூறியதாவது: 2001-2006-இல் மின்வாரியத்தின் வருவாய் ரூ.59,084 கோடியாகவும், செலவு ரூ.67,439 கோடியாக இருந்தது. அப்போது பற்றாக்குறை ரூ.8,355 கோடியாக இருந்தது. தொடர்ந்து, 2021-2026 காலகட்டத்தில் மின்வாரியத்தின் மொத்த செலவு ரூ.5.32 லட்சம் கோடியாகவும், வருவாய் ரூ.4.97 லட்சம் கோடியாகவும் உயர்ந்துள்ளது. இதனால் ரூ.34,447 கோடி பற்றாக்குறை ஏற்பட்டுள்ளது.

2001-2006 காலகட்டத்தில் மின் வாரியத்தால் ரூ.2,831 கோடி கடன் வாங்கப்பட்டுள்ளது. 2021-2026 வரையிலான காலகட்டத்தில் மட்டும் ரூ.87,399 கோடி கடன் வாங்கப்பட்டுள்ளது. 31.3.2026 நிலவரப்படி மின்வாரியத்தின் மொத்த கடன் தொகை ரூ.2.47 லட்சம் கோடியாக உள்ளது.

கடந்த 25 ஆண்டுகளில் மின்வாரியத்தின் வருவாய் மற்றும் செலவு கணிசமாக உயர்ந்தபோதிலும், அதற்கேற்ப உள்கட்டமைப்பு மேம்பாடுகள் மேற்கொள்ளப்படவில்லை.

மின் கட்டணம் உயர்த்தப்பட்ட ஒவ்வொரு முறையும் வருவாயும் அதிகரித்துள்ளது. ஆனால், அந்த வருவாயின் பலன் மக்களுக்கும், தொழில் துறைக்கும், மின் துறைக்கும் முழுமையாகக் கிடைக்கவில்லை.