குடியுரிமையை ஆய்வு செய்ய அதிகாரம்

உச்சநீதிமன்றத்தில் தேர்தல் ஆணையம் வாதம்

- 

'குடியுரிமையை ஆய்வு செய்ய தங்களுக்கு அதிகாரம் உள்ளது' என உச்சநீதிமன்றத்தில் இந்திய தேர்தல் ஆணையம் செவ்வாய்க்கிழமை தெரிவித்தது.

மேலும், வேறு நாட்டின் குடியுரிமையை ஒருவர் பெறும் விவகாரத்தில் தேர்தல் ஆணையத்தின் கருத்தை பின்பற்றி குடியரசுத்தலைவர் செயல்பட வேண்டும் எனவும் தேர்தல் ஆணையம் தெரிவித்தது.

மாநிலங்களில் தேர்தல் ஆணையம் மேற்கொண்ட வாக்காளர் பட்டியல் சிறப்பு தீவிர திருத்த (எஸ்ஐஆர்) நடவடிக்கையின் அரசமைப்புச் சட்ட அதிகாரம் குறித்து பல்வேறு மனுக்கள் உச்சநீதிமன்றத்தில் தாக்கல் செய்யப்பட்டன.

இதில் தேர்தல் ஆணையத்தின் அதிகாரம், குடியுரிமையை ஆய்வு செய்யும் உரிமை மற்றும் வாக்குரிமை குறித்து பல்வேறு கேள்விகள் எழுப்பப்பட்டன.

இந்த மனுக்கள் மீதான இறுதிக்கட்ட விசாரணை உச்சநீதிமன்றத் தலைமை நீதிபதி சூர்ய காந்த் மற்றும் நீதிபதி ஜயமால்ய பாக்சி ஆகியோர் அடங்கிய அமர்வு முன் நடைபெற்று வருகிறது.

உண்மையான அதிகாரம்:

அதன் ஒரு பகுதியாக செவ்வாய்க்கிழமை நடைபெற்ற விசாரணையில் தேர்தல் ஆணையம் சார்பாக மூத்த வழக்குரைஞர் ராகேஷ் துவிவேதி ஆஜராகி வாதிட்டதாவது: வாக்காளர் பட்டியலைத் தயாரிப்பது, தேர்தலை நடத்துவது என தேர்தல் நடைமுறைகளை அமல்படுத்துவதில் உண்மையான அதிகாரமிக்க ஆணையமாக தேர்தல் ஆணையம் செயல்படுகிறது.