வாக்காளர் பட்டியல் சிறப்பு திருத்தம்- ஒரு மக்கள் பணி

எனது பள்ளிப் பருவம் முதல் சுமார் 10 ஆண்டுகள், காமராஜர் தலைமையிலான காங்கிரஸ் கட்சியில் பணியாற்றிய தீவிர தொண்டன் என்ற முறையில், எனக்கு, வாக்காளர் பட்டியல் குறித்த சிறப்பு தீவிர திருத்த நடைமுறை (எஸ்ஐஆர்) மீதான அண்மைக் கால விவாதம் நகைச்சுவையாக உள்ளது.

- எஸ்.குருமூர்த்தி

தற்போது எஸ்ஐஆர் என்று அழைக்கப்படும் தேர்தல் ஆணையத்தின் செயல்பாடு, அரசியல் தொண்டனாக நான் பணியாற்றிய போது, கட்சி ஊழியர்களின் வழக்கமான தேர்தல் செயல்பாடாகவே இருந்தது. கடந்த 1960-களிலிருந்து நான் வசிக்கும் மயிலாப்பூர் சட்டப்பேரவைத் தொகுதியில், அந்தப் பகுதியில் காங்கிரஸ் தலைவராக இருந்த எனது சட்ட ஆசிரியரின் வழிகாட்டுதலின்படி, நானும் இதர தொண்டர்களும் தேர்தலுக்கு ஆறு மாதங்களுக்கு முன்பு ஒவ்வொரு வீட்டுக்கும், குடிசைக்கும் நேரில் செல்வது வழக்கமாக இருந்தது. எங்கள் கைகளில் இருக்கும் வாக்காளர் பட்டியலை வைத்து அதில் இருப்பவர்கள் காலமாகி இருந்தாலும், புதிதாக குடி வந்திருந்தாலும், வேறு இடத்துக்கு மாற்றலாகி இருந்தாலும் கட்சியின் தலைமையின் வாயிலாக எழுத்துபூர்வமாக தேர்தல் ஆணையத்துக்குத் தெரிவிப்போம்.

புதிய வாக்காளர்களின் பெயர்களைச் சேர்ப்பது, உயிரிழந்த அல்லது வேறு இடங்களுக்கு மாற்றலான வாக்காளர்களின் பெயர்களை நீக்குவது மற்றும் வாக்காளர் பட்டியலைப் புதுப்பிப்பது போன்ற பணிகளில் நாங்கள் உதவுவோம். இந்திய தேர்தல் ஆணையத்துக்கு உதவும் காங்கிரஸ் கட்சியின் எஸ்ஐஆர் அணியாக நாங்கள் செயல்பட்டோம். திராவிட முன்னேற்றக் கழக தொண்டர்கள் மிகுந்த அர்ப்பணிப்பு மற்றும் கடின உழைப்பை வெளிப்படுத்தியதால், எஸ்ஐஆர் பணிகளில் திறம்படச் செயல்பட்டார்கள்.

இன்று வாக்குச்சாவடி நிலை அலுவலர்கள் மேற்கொள்ளும் பணியை அன்று கட்சித் தொண்டர்கள் செய்தனர். வாக்காளர் பட்டியலைத் தயாரிப்பதில் அரசியல் கட்சிகளும், தேர்தல் ஆணையமும் ஒருங்கிணைந்து பணியாற்றின. இதை மற்ற கட்சிகளின் எஸ்ஐஆர் அணியும் சரிபார்த்துக் கொள்ள முடியும்.

இன்று மயிலாப்பூர் வீதிகளில் நான் நடந்து செல்கையில், ஒரு சில வீடுகளுக்குச் சென்றிருந்த தருணத்தை இன்னும் நினைவுகூர்கிறேன். அந்தக் காலத்துடன் ஒப்பிடும்போது, இன்றைய அரசியல் கட்சிகள் வாக்காளர்களிடமிருந்து துண்டிக்கப்பட்டு, மக்கள் பணியாக தாங்களும் எஸ்ஐஆர் நடைமுறையில் ஈடுபட்டு வந்தோம் என்பதை அறியாமல் இருப்பதை, தற்போது எஸ்ஐஆர் குறித்து நடந்து வரும் சர்ச்சைக்குரிய விவாதம் அம்பலப்படுத்துகிறது.