சுற்றுலாத் தலங்களின் அழகைப் பேணுவோம்!

மலைகளின் இளவரசி என்று அழைக்கப்படும் கொடைக்கானலில் உள்ள நட்சத்திர ஏரியில் குவியும் குப்பைகளைப் பற்றி வெளிவரும் செய்திகள் நம்மை அதிர வைக்கின்றன.

- எஸ்.ஸ்ரீதுரை

மலைகளின் இளவரசி என்று அழைக்கப்படும் கொடைக்கானலில் உள்ள நட்சத்திர ஏரியில் குவியும் குப்பைகளைப் பற்றி வெளிவரும் செய்திகள் நம்மை அதிர வைக்கின்றன. கடந்த ஜனவரி மாதத்துடன் நிறைவுபெற்ற மூன்று மாத காலத்தில் மட்டும் அந்த ஏரியிலிருந்து சுமார் 25 டன் அளவிலான பல்வேறு குப்பைகள், தாவரங்களின் களைகளுடன் ஐந்து டன் எடையுள்ள மதுபாட்டில்களும் அகற்றப்பட்டுள்ளன.

1863-ஆம் ஆண்டு உருவாக்கப்பட்ட இந்த ஏரியானது சுமார் மூன்று மீட்டர் ஆழத்துடன் நட்சத்திர வடிவில் அமைந்துள்ளது. கொடைக்கானலுக்கு வரும் பயணிகள் அனைவரும் இந்த ஏரியில் படகுச்சவாரி செய்து மகிழ்வர். அத்தகைய ஏரி, சுற்றுலாப் பயணிகள் வீசி எறியும் பல்வேறு குப்பைகளால் மாசுபடுவது மிகவும் வருந்தத்தக்கதாகும்.

தமிழ்நாட்டிலுள்ள முக்கியமான மலைவாசஸ்தலங்களாகிய கொடைக்கானல், ஊட்டி, ஏற்காடு, ஏலகிரி, கொல்லிமலை ஆகியவற்றுக்குக் கோடையில் பல்லாயிரக்கணக்கான மக்கள் சுற்றுலா செல்கின்றனர். அவ்வாறு பயணம் செல்லும் மக்கள், தங்களுக்குப் புத்துணர்வு அளிக்கும் அந்த மலைவாசஸ்தலங்களின் தூய்மையையும், அழகையும் சீர்குலைக்கும் வகையில் செயல்படுவது எவ்விதத்தில் சரியாக இருக்கும்?