இலங்கையில் புயல், மழையால் உயிரிழப்பு 153-ஆக உயர்வு

மேலும் 29 டன் நிவாரண பொருள்களை அனுப்பியது இந்தியா

- 

இலங்கையில் 'டித்வா' புயலின் கோரத்தாண்டவத்தால் உயிரிழந்தோரின் எண்ணிக்கை 153-ஆக அதிகரித்தது. மழை வெள்ள பாதிப்புகளில் சிக்கி மாயமானோரின் எண்ணிக்கை 191-ஆக உயர்ந்தது. இதையடுத்து, நாடு முழுவதும் அவசரநிலையை இலங்கை அரசு சனிக்கிழமை அறிவித்தது.

இதையடுத்து, உணவு, மருந்து, நாப்கின் உள்பட 29 டன் நிவாரணப்பொருள்களை இந்திய விமானப் படையின் இரு போர் விமானங்கள் மூலம் இந்தியா சனிக்கிழமை அனுப்பியது.

கடந்த 8 ஆண்டுகளில் இல்லாத அளவுக்கு கடும் சேதத்தை டித்வா புயல் ஏற்படுத்திய நிலையில், அவசரநிலை பிரகடனப்படுத்தப்படுவதாக இலங்கை அதிபர் அனுர குமார திசநாயக அறிவித்தார். மேலும், சர்வதேச நாடுகளின் உதவியையும் அவர் கோரியுள்ளார்.

இலங்கையைவிட்டு டித்வா புயல் இந்தியா நோக்கி சனிக்கிழமை நகரத் தொடங்கினாலும் அங்கு அடுத்த சில தினங்களுக்கு கனமழை பெய்ய வாய்ப்புள்ளதாக அந்நாட்டு வானிலை மையம் கணித்துள்ளது.

7 லட்சம் பேர் பாதிப்பு: இலங்கையில் டித்வா புயலால் ஏற்பட்ட மழை வெள்ள பாதிப்புகள் மற்றும் நிலச்சரிவில் சிக்கி சனிக்கிழமை வரை 153 பேர் உயிரிழந்தனர். 191 பேர் மாயமாகினர். சுமார் 2 லட்சம் குடும்பங்களைச் சேர்ந்த 7.74 லட்சம் பேர் இதுவரை பாதிக்கப்பட்டுள்ளதாக இலங்கை பேரிடர் மேலாண்மை மையம் (டிஎம்சி) தெரிவித்தது.