தீபாவளி: அக்.16 முதல் 20,378 பேருந்துகள் இயக்கப்படும்

தீபாவளி பண்டிகையை முன்னிட்டு அக்.16 முதல் அக்.19-ஆம் தேதி வரை வழக்கமான பேருந்துகள், சிறப்பு பேருந்துகள் என 20,378 பேருந்துகள் இயக்கப்படும் என்று போக்குவரத்துத் துறை அமைச்சர் சா.சி. சிவசங்கர் தெரிவித்தார்.

- 

தீபாவளி பண்டிகையை முன்னிட்டு, அரசுப் போக்குவரத்துக் கழகம் சார்பில் மேற்கொள்ளப்படும் சிறப்பு ஏற்பாடுகள் குறித்த ஆலோசனைக் கூட்டம் அமைச்சர் சா.சி.சிவசங்கர் தலைமையில் தலைமைச் செயலகத்தில் திங்கள்கிழமை நடைபெற்றது. பின்னர், செய்தியாளர்களிடம் அமைச்சர் சா.சி. சிவசங்கர் கூறியதாவது:

தீபாவளி பண்டிகையை முன்னிட்டு, அக்.16 முதல் 19 வரை சென்னையிலிருந்து வழக்கமாக இயக்கப்படும் 8,368 பேருந்துகளுடன், 5,900 சிறப்பு பேருந்துகள் இயக்கப்படவுள்ளன. அதே போல, பிற நகரங்களில் இருந்து 6,110 சிறப்பு பேருந்துகள் இயக்கப்படும். 4 நாள்களில் மொத்தம் 20,378 பேருந்துகள் இயக்கப்படவுள்ளன.

தீபாவளி பண்டிகை முடிந்த பின்னர், பிற நகரங்களில் இருந்து சென்னை வரும் பயணிகளுக்காக அக்.21 முதல் 23 வரை வழக்கமாக இயக்கப்படும் 6,276 பேருந்துகளுடன், 4,253 சிறப்பு பேருந்துகள் இயக்கப்படவுள்ளன.

மேலும், சென்னையைத் தவிர்த்து பிற நகரங்களுக்கு 4,600 சிறப்பு பேருந்துகள் என மொத்தம் 15,129 பேருந்துகள் இயக்கப்படவுள்ளன.