சென்னை உள்பட 9 இடங்களில் வெயில் சதம்

தமிழகத்தில் திங்கள்கிழமை சென்னை உள்பட 9 இடங்களில் வெப்பநிலை 100 டிகிரி ஃபாரன்ஹீட்டுக்கும் அதிகமாக பதிவானது.

- 

சென்னை, ஜூன் 9:

இது குறித்து சென்னை வானிலை ஆய்வு மையம் சார்பில் வெளியிடப்பட்ட செய்திக் குறிப்பு:

தமிழகம் மற்றும் புதுச்சேரியில் திங்கள்கிழமை அதிகபட்ச வெப்பநிலை இயல்பைவிட 4 டிகிரி செல்சியஸ் அதிகமாக இருந்தது. இதில் அதிகபட்சமாக, தூத்துக்குடியில் 102.92 டிகிரி ஃபாரன்ஹீட் வெப்பம் பதிவானது. மேலும், மதுரை விமான நிலையம் - 102.2, சென்னை மீனம்பாக்கம் - 101.66, மதுரை நகரம் - 101.12, பாளையங்கோட்டை, அதிராம்பட்டினம் - தலா 100.58, சென்னை நுங்கம்பாக்கம், பரமத்திவேலூர், நாகை - தலா 100.4 டிகிரி ஃபாரன்ஹீட் என மொத்தம் 9 இடங்களில் வெயில் சதமடித்ததுள்ளது.

மேலும், தமிழகம், புதுச்சேரி மற்றும் காரைக்காலில் அடுத்த 4 நாட்களுக்கு வெப்பநிலை இயல்பைவிட 2 டிகிரி செல்சியஸ் குறையும்.