காங்கிரஸ் கோஷ்டிப் பூசலே அமலாக்கத் துறை சோதனைக்கு காரணம்

நடிகை ரன்யா ராவ் தங்கக் கடத்தல் வழக்கில் கர்நாடக உள் துறை அமைச்சர் ஜி.பரமேஸ்வருக்குச் சொந்தமான கல்வி நிறுவனங்களில் அமலாக்கத் துறை சோதனை நடத்தியதற்கு காங்கிரஸ் கட்சியில் நிலவும் கோஷ்டிப் பூசலே காரணம் என்று மத்திய உணவு மற்றும் பொதுவழங்கல் துறை அமைச்சர் பிரல்ஹாத் ஜோஷி தெரிவித்தார்.

- 

கதக், மே 23:

துபையில் இருந்து ரூ.12.56 கோடி மதிப்பிலான 14.2 கிலோ தங்கத்தை பெங்களூருக்கு கடத்தி வந்தபோது ரன்யா ராவை மத்திய அரசின் வருவாய் புலனாய்வு இயக்குநரக அதிகாரிகள் மார்ச் 3-ஆம் தேதி கைது செய்து சிறையில் அடைத்துள்ளனர்.

இதுதவிர, ரன்யா ராவின் வீட்டில் வருவாய் புலனாய்வு இயக்குநரக அதிகாரிகள் நடத்திய சோதனையில் ரூ.2.67 கோடி மதிப்புள்ள தங்கநகை மற்றும் பணத்தை கைப்பற்றியுள்ளனர். கடுமையான விதிகள் கொண்ட அந்நியச் செலாவணி பாதுகாப்பு மற்றும் கடத்தல் நடவடிக்கைகள் தடுப்புச் சட்டம், 1974 (கோபிபோசா) இன் கீழ் வழக்குப் பதிந்து ரன்யா ராவ் விசாரிக்கப்பட்டு வருகிறார்.

சிபிஐ, வருவாய் புலனாய்வு இயக்குநரகத்தின் புகாரின் பேரில், நாடுமுழுவதும் நடைபெற்றுவரும் தங்கக் கடத்தல் தொடர்பாக வழக்குப் பதிந்துள்ள அமலாக்கத் துறை, அதுதொடர்பாக நடைபெற்றுள்ள அந்நியச் செலாவணி மோசடி மற்றும் நிதிமுறைகேடுகள் குறித்து பணப் பதுக்கல் தடுப்புச் சட்டத்தின் கீழ் விசாரித்து வருகிறது.