திருச்சபையின் புதிய மேய்ப்பர்!

ஏறத்தாழ 140 கோடி மக்களின் நம்பிக்கையைப் பெற்ற கத்தோலிக்கத் திருச்சபையின் புதிய மேய்ப்பராக, போப் பதினான்காம் லியோ என்கிற பெயரில் பதவி ஏற்றிருக்கிறார் கார்டினல் ராபர்ட் பிரான்சிஸ் ப்ரிவோஸ்ட்.

- 

69 வயதான புதிய போப்பாண்டவர் அமெரிக்கர் என்பது கத்தோலிக்கத் திருச்சபை வரலாற்றில் புதியதொரு திருப்பம்.

வல்லரசான அமெரிக்காவிலிருந்து ஒருவர் போப்பாண்டவராகத் தேர்ந்தெடுக்கப்பட்டால், அமெரிக்க ஆதிக்கம் திருச்சபையையும் ஆக்கிரமித்துக் கொள்ளும் என்கிற அச்சம்தான் இதுவரை தடையாக இருந்தது. முந்தைய போப்பாண்டவரான பிரான்சிஸ், தென் அமெரிக்காவைச் சேர்ந்தவர் என்றபோதே காற்று திசை மாறுகிறது என்று பலரும் குறிப்பிட்டிருந்தார்கள்.

கடந்த மாதம், திருச்சபையின் தலைவராக இருந்த போப் பிரான்சிஸ் மறைந்ததைத் தொடர்ந்து, மரபுப்படி நடைபெற்ற கூட்டம் கார்டினல் ப்ரிவோஸ்ட்டை தேர்ந்தெடுத்தது. வாடிகனில் உள்ள சிஸ்டைன் தேவாலயத்தில் 77 நாடுகளைச் சேர்ந்த 133 கார்டினல்களால் ரகசிய வாக்கெடுப்பின் மூலம் தேர்ந்தெடுக்கப்பட்ட கார்டினல் ப்ரிவோஸ்ட் உடனடியாகப் போப்பாண்டவராக அறிவிக்கப்பட்டு, காத்திருந்த விசுவாசிகளுக்கு ஆசி வழங்கினார் என்றாலும், நேற்று செயின்ட் பீட்டர்ஸ் சதுக்கத்தில் நடந்த பிரார்த்தனைக் கூட்டத்தில்தான் முறைப்படி போப்பாண்டவராகப் பதவி ஏற்றுக் கொண்டதாகக் கருதப்பட வேண்டும்.

ரகசிய வாக்கெடுப்புக் கூட்டத்துக்குப் போகும்போது, போப்பாண்டவராகத் தேர்ந்தெடுக்கப்படுவார் என்று கருதப்படுபவர்கள், பெரும்பாலும் தேர்ந்தெடுக்கப்படாமல் கார்டினலாக வெளியே வருவதுதான் வழக்கம். இந்த முறையும் கார்டினல் ப்ரிவோஸ்டின் பெயர் அடிபடவில்லை. அதற்கு முக்கியமான காரணம் அவர் அமெரிக்கர் என்பது.