மகளிரின் போராட்டமும் உரிமைகளும்...

இன்றைய நவீன பெண் தொழிலாளர்கள், பெண் ஊழியர்கள் என அனைவரும் பணியிடத்தில் தங்களுக்கான பாதுகாப்பின்மை, ஆண்-பெண் பாலியல் பாகுபாடு, உழைப்புக்கேற்ற ஊதியம், எட்டு மணி நேர பணி நேரம் உள்ளிட்ட கோரிக்கைகளை முன்வைத்து போராட வேண்டும்.

- 

உலகம் முழுவதும் மார்ச் 8-ஆம் தேதி சர்வதேச உழைக்கும் மகளிர் தினம் கடைப்பிடிக்கப்பட்டு வருகிறது. தமிழகத்திலும் ஒவ்வோர் ஆண்டும் மகளிர் தின கொண்டாட்டங்கள் வாழ்த்துகள் அதிகரித்து வருகின்றன.

இந்த தினம் எப்போது தோன்றியது, அதன் பின்னணி என்ன? என்ற வரலாற்றை அனைவரும் அறிந்து கொண்டால்தான் தற்போதைய சூழலில் உழைப்பில் ஈடுபடும் பெண்களின் சூழ்நிலை, பிரச்னைகள் குறித்து புரிந்து கொள்ள முடியும்.

1820-ஆம் ஆண்டு புதிய பிரிட்டனில் முதன்முதலாக தையல் பெண் தொழிலாளர்கள் போராட்டம் நடத்தினர். அதன்பின்பு 1844-ஆம் ஆண்டு நடைபெற்ற கம்யூனிச உலகக் கூட்டத்தில் ஜவுளி ஆலையில் பணியாற்றும் பெண்களுக்கான போராட்டம் நடைபெற்றது.

தொழிலாளிகளின் 10 மணி நேரப் பணி நேரம், தொழிற்சாலைகளில் பெண்கள் சந்திக்கும் பிரச்னைகள் ஆகியவை குறித்து இந்தப் போராட்டத்தில் விவாதிக்கப்பட்டது.

குறைவான கூலி கொடுத்தால் போதும்; அதிக மணி நேரம் வேலை வாங்கலாம் என்பதால் பெண் தொழிலாளர்கள் பணியமர்த்தப்பட்டனர். குறைவான கூலி; 15 மணி நேரம் வேலை; கடுமையான பணி; கடுமையான அபராதங்கள்; காற்றோட்டம் - வெளிச்சம் இல்லாத பணிச்சூழல்; குழந்தைகளுக்கு அதிகப் பணி நேரம் என்று மோசமான சூழ்நிலை நிலவியது.

இதை எதிர்த்து அவ்வப்போது பெண் தொழிலாளர்கள் போராடி வந்தனர். ஜெர்மனிய தொழிற்சங்கத் தலைவரும் சோஷலிச ஜனநாயக கட்சியின் முக்கியத் தலைவருமான கிளாரா ஜெட்கின் பெண் தொழிலாளர்கள் சந்திக்கும் பிரச்னைகள் குறித்து, 1889-ஆம் ஆண்டு ஜூலை 14-ஆம் தேதி நடைபெற்ற இரண்டாம் கம்யூனிச உலகக் கூட்டத்தில் விரிவாக விளக்கி பேசினார்.

அதிகமான பணி நேரம், மிகக் குறைவான கூலி, மிக மோசமான பணியிடம் - குறிப்பாக, பெண்களின் உழைப்புக்கு உரிய அங்கீகாரம் மற்றும் மதிப்பு கிடைக்காதது ஆகியவை குறித்து விளக்கிப் பேசினார். மேலும், ஆண் தொழிலாளர்களுடன் இணைந்து போராட்டத்தில் ஈடுபடுவதன் மூலம்தான் பெண் தொழிலாளர்கள் விடுதலை அடைய முடியும் என்பதையும் வலியுறுத்தினார்.