துபையிலிருந்து தங்கம் கடத்தி வந்த கன்னட நடிகை வீட்டில் சோதனை

துபையிலிருந்து தங்கம் கடத்தி வந்த கன்னட நடிகை ரன்யா ராவின் வீட்டில் சோதனை நடத்திய மத்திய வருவாய் புலனாய்வு இயக்கக அதிகாரிகள், ரூ. 17.29 கோடி மதிப்புள்ள தங்கம், ரொக்கத்தை பறிமுதல் செய்தனர்.

- 

பெங்களூரு, மார்ச் 5:

சிக்கமகளூரைச் சேர்ந்த நடிகை ரன்யா ராவ் (33), கர்நாடக காவல் துறையில் மூத்த ஐபிஎஸ் அதிகாரியாக பணியாற்றி வரும் கர்நாடக மாநில காவல் வீட்டுவசதி, உள்கட்டமைப்பு வளர்ச்சிக் கழகத் தலைவர், மேலாண் இயக்குநரும், டிஜிபியுமான கே.ராமசந்திர ராவின் வளர்ப்பு மகளாவார். ராமசந்திர ராவின் இரண்டாவது மனைவிக்கும் அவரது முதல் கணவருக்கும் பிறந்தவர்தான் ரன்யா ராவ்.

பெங்களூரு, தயானந்தசாகர் கல்லூரியில் இளநிலை பொறியியல் பட்டப்படிப்பை முடித்த ரன்யா ராவ், 2014-இல் நடிகர் சுதீப்புடன் 'மாணிக்யா', 'பட்டாக்கி' ஆகிய 2 கன்னடப் படங்களிலும், 2016-இல் நடிகர் விக்ரம் பிரபுடன் 'வாகா' என்ற தமிழ்ப் படத்திலும் நடித்தார்.

தங்கக் கடத்தல்: திரைப்பட வாய்ப்புகள் குறைவாக இருந்த நிலையில், இவர் அடிக்கடி துபைக்கு சென்று வந்தார். கடந்த 15 நாள்களில் மட்டும் 4 முறை துபைக்கு சென்ற ரன்யா ராவ், பெங்களூருக்கு திரும்பும்போது அளவுக்கு அதிகமாக தங்க நகைகளை அணிந்து வந்தார். காவல் துறை உயரதிகாரியின் வளர்ப்பு மகள் என்பதால், விமானநிலையத்தில் எவ்வித சோதனையும் இல்லாமல் வெளியே அனுமதிக்கப்பட்டார். இந்த வாய்ப்பை பயன்படுத்திக் கொண்டு, துபையில் இருந்து அதிக அளவிலான தங்க நகைகளை அணிந்தும், உடைகளில் தங்கத்தை மறைத்தும் கொண்டு வந்தார்.