கப்பல் கட்டும் துறையில் இந்தியா முன்னேற்றமடையும்

மத்திய அமைச்சர் சர்வானந்த சோனோவால்

- 

தூத்துக்குடி, செப். 5: கப்பல் கட்டும் துறையில் உலகில் முதல் ஐந்து இடங்களில் ஒன்றாக இந்தியா உருவாகும் என மத்திய துறைமுகங்கள், கப்பல் போக்குவரத்து மற்றும் நீர்வழிகள் துறை அமைச்சர் சர்வானந்த சோனோவால் தெரிவித்தார்.

தூத்துக்குடி வ.உ.சி. துறைமுகத்தில், பசுமை ஹைட்ரஜன் முன்னோடி ஆலை திறப்பு விழா வெள்ளிக்கிழமை நடைபெற்றது. மத்திய அமைச்சர் சர்வானந்த சோனோவால் கலந்துகொண்டு பசுமை ஹைட்ரஜன் முன்னோடி ஆலையைத் திறந்து வைத்தார்.

தொடர்ந்து, ரூ.350 கோடி மதிப்பில் துறைமுகத்தில் நடைபெறும் பல்வேறு வளர்ச்சித் திட்டப் பணிகளுக்கு அமைச்சர் அடிக்கல் நாட்டினார்.

பின்னர், அமைச்சர் முன்னிலையில், தூத்துக்குடியில் கப்பல் கட்டும் தளம், கப்பல் சரிசெய்யும் மையம் அமைப்பதற்காக தமிழக அரசுடன் புரிந்துணர்வு ஒப்பந்தம் மேற்கொள்ளப்பட்டது.