கோகோவை வெளியேற்றினார் ஒசாகா

கிராண்ட்ஸ்லாம் டென்னிஸ் போட்டியான யுஎஸ் ஓபனில், உலகின் 24-ஆம் நிலை வீராங்கனையான ஜப்பானின் நவோமி ஒசாகா, 3-ஆம் நிலையிலிருக்கும் அமெரிக்காவின் கோகோ கௌஃபை வீழ்த்தி காலிறுதிச்சுற்றுக்கு முன்னேறினார்.

- 

நியூயார்க், செப். 2:

மகளிர் ஒற்றையர் 4-ஆவது சுற்றில், 4 முறை கிராண்ட்ஸ்லாம் சாம்பியனான ஒசாகா 6-3, 6-2 என்ற நேர் செட்களில், 2 முறை கிராண்ட்ஸ்லாம் வென்றவரான கௌஃபை 1 மணி நேரம், 4 நிமிஷங்களில் வீழ்த்தினார்.

இவர்கள் நேருக்கு நேர் மோதியது, இது 6-ஆவது ஆட்டமாக இருக்க, 3-ஆவது வெற்றியுடன் கணக்கை சமன் செய்திருக்கிறார் ஒசாகா.

இந்த வெற்றியின் மூலமாக ஒசாகா, கடந்த 2021-க்குப் பிறகு முதல்முறையாக கிராண்ட்ஸ்லாம் போட்டிகளில் காலிறுதிச்சுற்றுக்கு முன்னேறியிருக்கிறார். அந்த ஆண்டில் அவர் ஆஸ்திரேலிய ஓபன் வென்றது நினைவுகூரத்தக்கது. 6 ஆண்டுகளுக்கு முன் இதே யுஎஸ் ஓபன் 3-ஆவது சுற்றில் இவர்கள் மோதியபோதும், நேர் செட்களில் கௌஃபை சாய்த்தார் ஒசாகா.

இதையடுத்து காலிறுதியில் அவர், செக் குடியரசின் கரோலின் முசோவாவை எதிர்கொள்கிறார். போட்டித்தரவரிசையில் 11-ஆம் இடத்திலிருக்கும் முசோவா 6-3, 6-7 (0/7), 6-3 என்ற கணக்கில், 27-ஆம் இடத்திலிருந்த உக்ரைனின் மார்த்தா கொஸ்டியுக்கை சாய்த்து காலிறுதிக்கு வந்துள்ளார்.