சங்கரன் மலையில் சோழர் கால கல்வெட்டு

கரூர் மாவட்டம், கிருஷ்ணராயபுரம் அருகேயுள்ள சங்கரன் மலையில் சோழர் கால கல்வெட்டு கண்டறியப்பட்டது.

- 

தஞ்சாவூர், ஆக. 18:

இந்தக் கல்வெட்டு குறித்து தஞ்சாவூர் வரலாறு, தொல்லியல் மற்றும் சுவடியியல் ஆய்வாளரும், சரசுவதி மகால் நூலகத் தமிழ்ப் பண்டிதருமான முனைவர் மணி. மாறன் தனது மாணவர்களுடனும், திருப்பூர் கிருஷ்ணகுமார், கரூர் தங்கராஜ் உதவியுடனும் ஆய்வு செய்து, திங்கள்கிழமை தெரிவித்தது:

சங்கரன் மலையின் தெற்கே சுமார் 220 அடி உயரத்தில் இரு பிளவுகளுக்கு இடையில் ஏறத்தாழ 10 அடி உயரம், 12 அடி அகலத்துக்கு 23 வரிகள் கொண்ட இரு பெரும் கல்வெட்டுகளும், அதே பகுதியில் பாறையின் கிடைமட்ட நிலையில் ஒரு கல்வெட்டும் என 3 கல்வெட்டுகள் கண்டறியப்பட்டன.

இக்கல்வெட்டுகள் மூன்றாம் குலோத்துங்க சோழனின் (கி.பி. 1178-1218) 12 மற்றும் 18-ஆவது ஆட்சியாண்டில் வெட்டப்பட்டவை. இவன் பாண்டியர்களை வென்றதால் சோழ பாண்டியன் என்றும் அழைக்கப்பட்டான்.