ஹைட்ரோ கார்பன் திட்டத்துக்கு அனுமதி இல்லை

தமிழக அரசு உறுதி

- 

சென்னை, ஆக.24:தமிழ்நாட்டின் எந்தப் பகுதியிலும் ஹைட்ரோ கார்பன் திட்டத்துக்கு அனுமதி தரப்படாது என்று நிதி மற்றும் சுற்றுச்சூழல் துறை அமைச்சர் தங்கம் தென்னரசு உறுதிபட தெரிவித்தார்.

மத்திய அரசின் பெட்ரோலியம் மற்றும் இயற்கை எரிவாயு அமைச்சகம், கடந்த 2011-இல் தமிழகத்தின் காவிரி டெல்டா மண்டலத்தில் பெட்ரோலியத்துக்கு மாற்று எரிபொருளாகப் பயன்படுத்தக்கூடிய மீத்தேன், ஹைட்ரோ கார்பன் எடுக்க ஆய்வு செய்வதற்கான முயற்சியைத் தொடங்கியது.

மீத்தேன், ஹைட்ரோ கார்பன் எரிவாயுத் திட்டத்தால் விவசாயம், கடல் வளம் பாதிக்கப்படும் என்பதால் இதற்கு கடும் எதிர்ப்பு எழுந்தது. விவசாயிகள், சமூக ஆர்வலர்கள், அனைத்து அரசியல் கட்சிகளின் எதிர்ப்பைத் தொடர்ந்து ஆய்வு முயற்சி கைவிடப்பட்டது. இருப்பினும் இந்த திட்டங்கள் குறித்து டெல்டா விவசாயிகளிடையே அச்சம் நிலவிவந்தது.

இதையடுத்து, இத்தகைய பிரச்னைகளில் இருந்து காவிரி டெல்டா மாவட்டங்களைப் பாதுகாக்கும் வகையில், கடந்த 2020-இல் அப்போதைய அதிமுக அரசு, பாதுகாக்கப்பட்ட வேளாண் மண்டலமாக டெல்டா மாவட்டங்களை அறிவித்தது. ஆனால், அதன் பிறகும் டெல்டா மாவட்டங்களில் ஹைட்ரோ கார்பன் கிணறுகள் அமைப்பதற்கான ஆய்வு முயற்சிகள் மேற்கொள்ளப்பட்டன. அதற்கு தமிழக அரசின் அனுமதி மறுக்கப்பட்டதையடுத்து, திட்டம் கைவிடப்பட்டது.