'சின்ன விஷயமா இது!'

தமிழக அரசியலில் சரியான நேரத்தில் தவறான முடிவுகளையெடுக்கும் அரசியல்வாதி வைகோ என்றால், சரியான நேரத்தில் சரியான முடிவுகளை எடுத்து வெற்றியும் அடைந்திருப்பவர் முதல்வர் சி. ஜோசப் விஜய்.

- டி.எஸ்.ஆர். வேங்கட ரமணா

மக்களவைத் தேர்தலுக்கு முன்பே கட்சி ஆரம்பித்துவிட்டு, என்னுடைய இலக்கு தமிழக சட்டப்பேரவைதான் என்று அறிவித்த அவருடைய ராஜதந்திரத்தை யாரும் பொருட்டாகவே எடுத்துக்கொள்ளவில்லை. 'ஆட்சியிலும் பங்கு, அதிகாரத்திலும் பங்கு' என்ற 'எலிப்பொறி தேங்காய் துண்டை' புறக்கணித்த அரசியல் ஆளுமை என்று சொல்லிக் கொண்டவர்களெல்லாம், தொட்டுவிடும் தொலைவில் இருந்த அமைச்சர் பதவி என்ற மசால் வடைக்கு மயங்கி, ஆளுநர் ஆட்சி வரக்கூடாதென்ற சப்பை காரணத்தைச் சொல்லி அமைச்சரவையில் ஐக்கியமாகி இருக்கிறார்கள்.

அவர்கள் அணி மாறுவதைத் தவிர்க்க முடியாமல் தி.மு.க. தலைமை அவர்களெல்லாம் தனிக்கட்சி என்று சொல்லிவிட்டு, காங்கிரஸ் மட்டும் முதுகில் குத்திவிட்டது என்று சொல்வது ஏமாற்றத்தை மடைமாற்ற நினைக்கும் நொண்டிச் சாக்கு. தேர்தலின் போது எனக்கும், திமுக-வுக்கும்தான் போட்டி என்று ஜோசப் விஜய் சொன்னதை மறந்து ஆறு அதிமுக எம்எல்ஏக்கள் ராஜினாமா செய்ததுதான் பரிதாபம்.

இந்தத் தேர்தலில் மற்றொரு அதிசயம் த.வெ.க.வின் விசில் சின்னம். உண்மையை உடைத்துச் சொல்ல வேண்டுமானால், பல இடங்களில் த.வெ.க.வின் வேட்பாளர்கள் யாரென்றே தெரியாமலேயே வாக்காளர்கள் விசிலடித்தார்கள். த.வெ.க. முழுமையாக வெற்றி பெறாமல் போனதற்கு காரணம், சோரம் போன, தொகுதிக்குள் வராத தங்களுடைய வேட்பாளர்கள்தான் என்பதையும், அவர்கள் யார் என்பதையும் முதல்வர் உளவுத் துறையை வைத்துக் கண்டறிந்து நடவடிக்கை எடுக்க வேண்டும்.

234 தொகுதிகளிலும் நானே வேட்பாளர் என்று விஜய் அசாத்திய துணிச்சலுடன் சொன்னாலும், அதுதான் உண்மையானது. வாக்குச்சீட்டில் வாக்காளர்கள் விசில் சின்னத்தில் விஜய்யை மட்டுமே பார்த்தார்கள். 'மரத்தை மறைத்தது மாமத யானை, மரத்தில் மறைந்தது மாமத யானை' என்ற திருமூலரின் வரிகள் மீண்டும் மெய்ப்பிக்கப்பட்டது.