வாக்குறுதிகளை திமுக நிறைவேற்றவில்லை

கடந்த சட்டப்பேரவைத் தேர்தலின்போது அளித்த வாக்குறுதிகளை திமுக நிறைவேற்றவில்லை என தமிழக வெற்றிக்கழகத் தலைவர் விஜய் குற்றஞ்சாட்டினார்.

- 

திருச்சி, செப். 13:

அடுத்த ஆண்டு நடைபெறவுள்ள பேரவைத் தேர்தலையொட்டி தவெக சார்பில் தமிழகம் முழுவதுமான மக்கள் சந்திப்பு இயக்கத்தை திருச்சி மரக்கடை பகுதியில் சனிக்கிழமை தொடங்கி விஜய் பேசியதாவது:

அடுத்த ஆண்டு நடைபெறும் ஜனநாயகப் போருக்கு (பேரவைத் தேர்தல்) முன் மக்களைச் சந்திக்க வந்துள்ளேன். திருச்சியில் பிரசாரம் தொடங்கினால் திருப்புமுனையாக அமையும். அதுக்கு உதாரணங்கள் உள்ளன.

காவிரிப் பிரச்னையிலும், விவசாயிகளுக்குத் தண்ணீர் வழங்குவதிலும் திமுக என்ன செய்தது? 2021 பேரவைத் தேர்தலில் திமுக 505 வாக்குறுதிகளைக் கொடுத்தது. அதில் எத்தனை நிறைவேற்றியிருக்கிறார்கள்? டீசல் விலை ரூ.3 குறைப்பு, மாதாந்திர மின் கணக்கீடு, மாணவர்களின் கல்விக் கடன் ரத்து, அரசு வேலையில் பெண்களுக்கு 40 சதவீத இடஒதுக்கீடு, பழைய ஓய்வூதியத் திட்டம், 2 லட்சம் அரசு காலிப் பணியிடங்கள் நிரப்புவது போன்ற வாக்குறுதிகள் எல்லாம் என்னவாயின?