நாளை குடியரசு துணைத் தலைவர் தேர்தல்

கூட்டணி எம்.பி.க்களுக்கு பிரதமர் இன்று விருந்து

- 

புவனேசுவரம், செப். 7: நாட்டின் 17-ஆவது குடியரசு துணைத் தலைவர் பதவிக்கான தேர்தல் செவ்வாய்க்கிழமை (செப்.9) நடைபெறவுள்ளது.

மக்களவை, மாநிலங்களவை எம்.பி.க்கள் வாக்களிக்கும் இத் தேர்தலில், ஆளும் தேசிய ஜனநாயக கூட்டணி வேட்பாளர் சி.பி. ராதாகிருஷ்ணன் (67), எதிர்க்கட்சிகளின் 'இண்டி' கூட்டணி வேட்பாளர் பி. சுதர்சன் ரெட்டி (79) ஆகியோர் இடையே நேரடிப் போட்டி நிலவுகிறது. எம்.பி.க்கள் பலத்தின் அடிப்படையில் சி.பி. ராதாகிருஷ்ணனுக்கே வெற்றி வாய்ப்புள்ளது.

இத்தேர்தலுக்கு முன்பாக, பாஜக மற்றும் கூட்டணிக் கட்சி எம்.பி.க்களுக்கு பிரதமர் மோடி திங்கள்கிழமை (செப். 8) இரவு விருந்து அளிக்கவுள்ளார்.

நாட்டின் இரண்டாவது உயர்ந்த அரசமைப்புப் பதவியான குடியரசு துணைத் தலைவர் பதவியை வகித்துவந்த ஜகதீப் தன்கர், நாடாளுமன்ற மழைக்கால கூட்டத் தொடரின் முதல் நாளான கடந்த ஜூலை 21-ஆம் தேதி திடீரென ராஜிநாமா செய்தார்.