காஸாவில் முழு போர் நிறுத்தம்: ஐ.நா.வில் இந்தியா வலியுறுத்தல்

இஸ்ரேலின் தடுப்பு நடவடிக்கைகள் காரணமாக பாலஸ்தீனத்தின் காஸா பகுதியில் பட்டினியால் உயிரிழக்கும் மக்களின் எண்ணிக்கை அதிகரித்து வரும் சூழலில், காஸாவில் இடைக்கால போர் நிறுத்தம் போதாது; முழுமையான போர் நிறுத்தம் அமல்படுத்தப்பட வேண்டும் என்று ஐ.நா. பாதுகாப்பு கவுன்சிலில் இந்தியா சார்பில் வலியுறுத்தப்பட்டது.

- 

நியூயார்க், ஜூலை 24:

ஐ.நா. பாதுகாப்பு கவுன்சிலில் புதன்கிழமை நடைபெற்ற பொது விவாதத்தின் போது ஐ.நா.வுக்கான இந்திய தூதர் பர்வதனேனி ஹரீஷ் இந்த வலியுறுத்தலை முன்வைத்தார்.

காஸா மீது தொடர் தீவிர தாக்குதலை நடத்தி வரும் இஸ்ரேல், போரால் பாதிக்கப்பட்ட மக்களுக்கு உணவுப் பொருள்கள் உள்ளிட்ட மனிதாபிமான உதவி கள் கிடைப்பதற்கும் தடை ஏற்படுத்தி வருகிறது. இதனால், உணவு கிடைக்காமலும், ஊட்டச்சத்து குறைபாட்டாலும் உயிரிழப்பவர்களின் எண்ணிக்கை காஸாவில் நாளுக்கு நாள் அதிகரித்து வருகிறது.

காஸாவில் மருத்துவமனைகள், மனிதாபிமான உதவி மையங்கள் மற்றும் உணவுக்காக காத்திருக்கும் மக்கள் மீதும் இஸ்ரேல் தாக்குதல் நடத்தி வருகிறது.