பிகார் தோல்வி: கூடுதல் அழுத்தத்தில் காங்கிரஸ் மேலிடம்!

பிகார் சட்டப்பேரவைத் தேர்தலில் எதிர்கொண்ட மோசமான தோல்வியிலிருந்து காங்கிரஸ் கட்சி இன்னும் மீளாத நிலையில், அடுத்த ஆண்டு மாநிலங்களவைத் தேர்தல்களை எதிர்கொள்ளும் சில மாநிலங்களில் கடுமையான போட்டியைச் சந்திக்கும் கட்டாயத்துக்கு அக்கட்சி தள்ளப்பட்டிருக்கிறது.

- நமது சிறப்பு நிருபர்

ஏற்கெனவே பல்வேறு மாநிலங்களில் நடந்த பேரவைத் தேர்தல்களில் காங்கிரஸ் கட்சி பறிகொடுத்த தொகுதிகளின் எண்ணிக்கை அதிகம். ஒவ்வொரு தேர்தலிலும் காங்கிரஸ் இழந்துவரும் சட்டப்பேரவை இடங்களின் எண்ணிக்கை அதிகரித்த வண்ணம் இருக்கிறது. இந்நிலையில், பிகாரிலும் தோல்வி முகத்தைச் சந்தித்துள்ள காங்கிரஸின் மாநிலங்களவை பலம் மேலும் குறைந்து அந்தக் கட்சி வலுவிழந்து வருவது தரவுகளின் பகுப்பாய்வு மூலம் தெளிவாகிறது.

அடுத்த ஆண்டு ஏப்ரல், ஜூன், நவம்பர் ஆகிய காலகட்டங்களில் மாநிலங்களவையில் கிட்டத்தட்ட 75 இடங்களுக்கான தேர்தல் நடைபெறவுள்ளது. அவற்றில் மாநிலத் தேர்தல்களில் இடங்களைப் பறிகொடுத்தது மற்றும் கூட்டணிக் கட்சிகளின் எண்ணிக்கை பலம் சுருங்கியதுபோன்ற காரணங்களால் சிக்கலான கட்டத்தை எதிர்கொள்ளும் நிலைக்கு காங்கிரஸ் தள்ளப்பட்டிருக்கிறது.

தேர்தல் ஆணையத்தின் தரவுகளின்படி, பிகார், கர்நாடகம், மகாராஷ்டிரம், மத்திய பிரதேசம், ராஜஸ்தான், உத்தர பிரதேசம், மேற்கு வங்கம், ஹிமாசல பிரதேசம் ஆகிய மாநிலங்களில் பதவிக் காலத்தை நிறைவு செய்யும் உறுப்பினர்களின் இடங்களை நிரப்புவதற்கான மாநிலங்களவைத் தேர்தல் நடைபெறவுள்ளது. இவற்றுக்கான தேர்தல் தேதியை தேர்தல் ஆணையம் அறிவிக்க இன்னும் சில மாதங்கள் ஆகலாம்.