பேரவையில் கூச்சல் - குழப்பம்: அதிமுகவினர் வெளியேற்றம்

சட்டப்பேரவையில் நேரமில்லாத நேரத்தில் எதிர்க்கட்சித் தலைவர் எடப்பாடி பழனிசாமியை பேச அனுமதிக்கக் கோரி அதிமுக உறுப்பினர்கள் கூச்சல்-குழப்பத்தில் ஈடுபட்டதால் அவர்கள் அனைவரும் கூண்டோடு வெளியேற்றப்பட்டனர்.

- 

சென்னை, மார்ச் 28: மேலும், அவர்களை நாள் முழுவதும் பேரவையிலிருந்து நீக்கி வைப்பதாகவும் பேரவைத் தலைவர் மு.அப்பாவு உத்தரவிட்டார்.

சட்டப்பேரவையில் வெள்ளிக்கிழமை கேள்வி நேரத்துக்குப் பிறகு, நேரமில்லாத நேரத்தில் எதிர்க்கட்சித் தலைவர் எடப்பாடி கே.பழனிசாமி சில முக்கிய பிரச்னைகளை எழுப்ப அனுமதி வேண்டும் என்றார். அப்போது, குறுக்கிட்ட பேரவைத் தலைவர் மு.அப்பாவு, இது பற்றி அறிவிப்பே தரவில்லை எப்படி அனுமதிக்க முடியும் என மறுப்புத் தெரிவித்தார். ஆனாலும், எடப்பாடி பழனிசாமி தொடர்ந்து பேச அனுமதி கோரினார்.

துரைமுருகன் கேள்வி: அவை முன்னவர் துரைமுருகன் கூறுகையில், இவ்வாறு பேச அனுமதி கோருவது எந்த வகையில் சரியானது? ஒரு பிரச்னையை எழுப்ப வேண்டுமெனில் முன்பே தகவல் தெரிவித்திருக்க வேண்டும். அதிமுகவினர் எத்தனை மணிக்கு தகவல் கொடுத்தார்கள்? என்று பேரவைத் தலைவரிடம் கேள்வி எழுப்பினார்.

அவருக்குப் பதிலளித்த அவைத் தலைவர், அவை தொடங்குவதற்கு அரை மணி நேரத்துக்கு முன்பாக தகவல் தர வேண்டும் என்பது மரபாக உள்ளது. ஆனால், இன்றைக்கு காலை 9.18 மணிக்கு என்னைச் சந்தித்த எதிர்க்கட்சி கொறடா, காவல் துறை பற்றி ஒரு பிரச்னையை நேரமில்லாத நேரத்தில் எழுப்பப் போகிறோம் என்றனர். விஷயத்தைச் சொல்லாமல் எப்படி அனுமதிக்க முடியும் என்று அப்போதே கேள்வி எழுப்பினேன் என்றார்.

ஓர் உறுப்பினர் என்ன பேசப் போகிறார் என்பதை முன்கூட்டியே அமைச்சருக்குத் தெரிவிக்க வேண்டும். அப்போதுதான் தகவல்கள், புள்ளிவிவரங்களைத் திரட்டி பதில் சொல்ல முடியும். தகவல்கள், புள்ளி விவரங்கள் இல்லாவிட்டால் பிரச்னையை எடுக்கக் கூடாது என்று அவை முன்னவர் உறுதிபடத் தெரிவித்தார்.