பணிவின் எல்லை

பெரியபுராணம் சிவனடியார் பெருமையைப் பாடும் சிறப்பினைப் படிக்கும் பிற சமயத்தினர் 'இப்படி நம் சமயத்தில் அடியார்களின் பெருமையைப் பாடும் அழகிய நூல் ஒன்று இல்லையே!' என்று ஏங்குகின்றனர். பெரிய புராணத்திற்கு முதல் நூல் திருத்தொண்டத் தொகை; வகை நூல் திருத்தொண்டர் திருவந்தாதி. இவ்விரு நூலாசிரியர்களையும் விஞ்சும் வகையில் சேக்கிழார் அடியார்கள் மீது காட்டும் மரியாதை அமைந்துள்ளது.

- முனைவர் தெ. ஞானசுந்தரம்

திருத்தொண்டத் தொகை அறுபது தனியடியார்களையும் ஒன்பது தொகை அடியார்களையும் பாடியுள்ளது. சுந்தரர் தனியடியார்களுள் இருபதின்மரைக் குறிக்கும்போது 'அன்' விகுதியிட்டு ஒருமையில் குறித்துள்ளார். சான்றாக,

இளையான்றன் குடிமாறன் அடியார்க்கும் அடியேன்,

திருநாவுக் கரையன்றன் அடியார்க்கும் அடியேன்,

தொன்மயிலை வாயிலான் அடியார்க்கும் அடியேன்,

எம்பிரான் சம்பந்தன் அடியார்க்கும் அடியேன்,

நம்பிரான் திருமூலன் அடியார்க்கும் அடியேன்

என்று வருவது காணலாம். 'அன்' விகுதி பெறாத பெயர்களை, 'மன்னவனாம் செருத்துணைதன் அடியார்க்கும் அடியேன்' 'மன்னியசீர் மறைநாவன் நின்றவூர்ப் பூசல்' என்று ஒருமையில் சுட்டும் வகையில் அடைமொழிகளில் 'அன்' விகுதியினைச் சேர்த்துள்ளார்.

ஏனைய அடியார்களை, 'விறன்மிண்டர்க் கடியேன்', 'எறிபத்தர்க் கடியேன்', 'கண்ணப்பர்க் கடியேன்' 'ஆனாயர்க் கடியேன்', என்று பன்மையில் பாடியுள்ளதாகத் திருத்தொண்டத்தொகைப் பதிப்புகள் பலவற்றில் காணப்படுகின்றன.