அத்வைதம் - வெற்றிக்கு வழி!

முழுமனதோடு ஆணித்தரமாக நம்பும் ஒன்றை 'வேதவாக்கு' என்று சொல்வது வழக்கம். வேதவாக்கு என்றால் என்ன? வேதங்களில் சொல்லப்பட்டிருக்கும் கருத்துகள். ஆக, வேதங்கள் சொல்வதே நமக்குப் பிரதானம். ஏன் வேதங்கள் நம் வாழ்வில் இவ்வளவு முக்கியத்துவம் பெற்றிருக்கின்றன? வேதத்தில் என்ன சொல்லப்பட்டிருக்கிறது?

- கோதை ஜோதிலட்சுமி

தத்துவம் என்பதை வேதாந்தம் என்று சொல்கிறோம். வேதம், அந்தம் என்ற இரண்டு சொற்கள் சேர்ந்து வேதாந்தம் ஆகிறது. வேதத்தின் இறுதிப் பகுதியாக வருவதனால் இப்பெயர் ஏற்பட்டது. வேதத்தின் முடிந்த முடிவாக இருப்பதனாலும் வேதாந்தம் என்று சொல்லலாம். உபநிஷதங்கள் என்றும் இதனைச் சொல்கிறோம்.

வேதாந்தத்துக்கு நம் அன்றாட வாழ்வில் அவசியம் இருக்கிறதா? தத்துவம் எல்லாம், வாழ்க்கையே வெறுத்துப் போனவர்கள் பேசுவதும் படிப்பதும் என்றுதானே கேள்விப்பட்டிருக்கிறோம்? ஆனால், வேதவாக்குக்கு எப்படி அன்றாட வாழ்வில் இத்தகைய மதிப்பு உண்டாயிற்று? எனில், உலகியல் வாழ்க்கையில் இதற்கு இடம் உண்டா?

வேதம் சொல்லும் தத்துவம் அத்வைதம். இந்தத் தத்துவமானது 'நான் யார்?' என்ற ஆன்மத் தேடலுக்கு விடை சொல்வது என்று கேட்டிருப்போம். ஆனால், இது ஆன்மத் தேடலோடு நம் அன்றாட வாழ்வை வெற்றிகரமாக வாழ்வதற்கும் கற்றுத் தருவது ஆகும். சமூக வாழ்க்கை சிறக்கவும், தனிமனித வாழ்க்கை மேம்படவும் இது உதவும்.

உயர்ந்தவன், தாழ்ந்தவன் என்ற ஏற்றத்தாழ்வற்ற சமத்துவ சமூகம் மலர அத்வைதம் வழிகாட்டுகிறது. அத்வைதம் என்றால் இரண்டாக இல்லாமல் இருப்பது என்று பொருள். அதாவது, இந்த மண்ணின் ஜீவன்கள் அனைத்தும் ஒன்றே, வேறுவேறானவை அல்ல. இதனை எளிமையாகப் புரிந்து கொள்ள பாரதி, காக்கை குருவி எங்கள் ஜாதி- நீள் கடலும் மலையும் எங்கள் கூட்டம்; நோக்குந் திசையெலாம் நாமன்றி வேறில்லை நோக்க நோக்கக் களியாட்டம் என்று விளக்கினார். அதாவது, அத்வைதம் மனிதர்கள் அனைவரும் சமம் என்பதையும் தாண்டி இந்த உலகமே ஒரே பொருள் என்கிறது.

'யஸ்தே கந்தஹ புருஷேணு ஸ்த்ரீஷு பும்ஸுஹு பாகோ ருசிஹி யோ அஸ்வேஷு வீரேஷு யோ ம்ருகேஷுத ஹஸ்திஷு கன்யாயாம் வர்சோ யத் பூமே தேனாஸ் மாம் அபி ஸம் ஸ்ருஜ மா நோத்விக்ஷத கஸ்சன' இது அதர்வண பூமி சூக்த 25-ஆம் மந்திரம். இதன் பொருள், உன் மணம் ஆண்களிடத்தும் பெண்களிடத்தும் உள்ளது. உன் ஆண்மையும் கம்பீரமும் மக்களிடத்தில் உள்ளது. அது வீரனிடத்திலும் குதிரையிலும் காணப்படுகிறது. அதை வனவிலங்கிடமும், யானையிடத்திலும் காணலாம். உன்னுடைய பிரகாசம் இளம் பெண்களிடத்தில் மிளிர்கிறது, இத்தனையையும் எனக்குக் கொடு, என்னை எவரும் வெறுக்காமல் இருக்கட்டும்.