இளைஞர்களுக்கு அதிகரித்துவரும் மாரடைப்பு அபாயம்!

தெலங்கானா மாநிலத் தலைநகர் ஹைதராபாத்தில் 26 வயது இளைஞர் ஒருவர், பேட்மிண்டன் விளையாடிக் கொண்டிருந்த போது திடீரென மாரடைப்பு ஏற்பட்டு உயிரிழந்த சம்பவம், இளம் வயதினரிடையே அதிகரித்து வரும் இதய நோய்கள் குறித்து கவனத்தைத் திருப்பியுள்ளது.

- 

ஹைதராபாத், ஆக. 3:

இந்த நிகழ்வையொட்டி ஆரோக்கிய வாழ்க்கை முறையின் முக்கியத்துவத்தை வலியுறுத்தும் இதய நல மருத்துவர்கள், அதிக மன அழுத்தம் உள்ள துறைகளில் பணிபுரியும் இளைஞர்கள் ஆரோக்கியமான வாழ்க்கை முறையைப் பின்பற்றுமாறும், வழக்கமான உடல் பரிசோதனைகளை மேற்கொள்ளுமாறும் அறிவுறுத்துகின்றனர்.

இதய நோய்களுக்கான காரணங்கள்: ஹைதராபாத்தில் உள்ள காமினேனி மருத்துவமனையின் மூத்த இதய நல மருத்துவர் சாகர் புயார், முன்பு 60 வயதில் காணப்பட்ட இதய நோய்கள், இப்போது 30 வயது இளைஞர்களுக்கும் வரத் தொடங்கியுள்ளதாக கவலை தெரிவித்தார்.

அவர் மேலும் கூறுகையில், "ரத்த நாளங்கள் மெதுவாக சுருங்குவது 60 வயதிலிருந்து, இப்போது 30-40 வயதினரிடம் அதிகரித்து காணப்படுகிறது. இதற்கு முக்கியக் காரணம், உடல் உழைப்பு இல்லாத வாழ்க்கை முறை, உணவுப் பழக்கவழக்கங்கள், மன அழுத்தம் ஆகியவைதான். இன்றைய பள்ளி மாணவர்களும் அதிக போட்டி நிறைந்த சூழல் மற்றும் செயல்திறன் அழுத்தத்தால் மன அழுத்தத்தை அனுபவித்து வருகின்றனர்' என்றார்.